Xəbər verdiyimiz kimi, dekabrın 24-də Abşeron rayonunun ərazisində məcburi köçkün ailələri üçün salınmış yeni yaşayış kompleksi istifadəyə verilib. Açılışında Prezident İlham Əliyevin də iştirak etdiyi şəhərcikdə layihə üzrə 23-ü 42, biri isə 35 mənzilli olan 7 mərtəbəli yaşayış binası inşa olunub. Bu yaşayış kompleksi ölkə üzrə məcburi köçkünlər üçün salınan sayca 101-ci şəhərcikdir.
Qaçqınların və Məcburi Köçkünlərin İşləri üzrə Dövlət Komitəsinin Mətbuat xidmətindən Xeberle.com-a verilən məlumata görə, məcburi köçkünlərin yeni mənzillərə köçürülməsi prosesi mərhələləli şəkildə aparılır. Öncə qəzalı və ağır şəraitdə yaşayan məcburi köçkün ailələrinin mənzil-məişət şəraiti yaxşılaşdırılır. Sumqayıt və Sumqayıt ətrafından kompleksə 1000 ailə köçürüləcək: "Növbəti mərhələlərdə də yeni mənzillərə zirzəmilərdə, ağır və qəzalı şəraitdə yaşayan ailələrin köçürülməsi təmin ediləcək. Çox ağır şəraitdə yaşayan məcburi köçkünlərin ilk növbədə köçürülməsi mexanizmini təkmilləşdirmək üçün Komitə sədrinin Sərəncamı ilə komissiya və işçi qrupu yaradılıb. Yerli icra hakimiyyəti tərəfindən tərtib edilmiş siyahılar işçi qrupu tərəfindən yerində yoxlanılılır. İşçi qrupunun araşdırması nəticəsində hazırlanmış yekun siyahı tərtib edilərək təsdiq edilməsi üçün komissiyaya təqdim edilir. Komissiya işçi qrupu tərəfindən təqdim edilmiş siyahıları təsdiq edərək, siyahıda adları göstərilən məcburi köçkün ailələrinin köçürülməsini həyata keçirmək üçün həmin siyahıları Repatriasiya departamentinə təqdim edir. Repatriasiya departamenti isə komissiyanın təqdim etdiyi yekun siyahıya uyğun olaraq məcburi köçkün ailələrinin onlara verilmiş yeni mənzillərə köçürülməsini təmin edir".
Xədicə Səxavətqızı,
Xeberle.com
Xəbərdən istifadə edərkən istinad etmək vacibdir.
