Sumqayıtdan koronavirus pandemiyası ilə bağlı mövcud vəziyyət heç də ürəkaçan deyl.
Koronavirus xəstələrinin müalicəsi və pandemiya ilə mübarizə üçün ayrılan 1 nömrəli Sumqayıt şəhər xəstəxanasının baş həkimi Nazim Hüseynquliyev Xeberle.com-a açıqlamasında vəziyyətin ciddi olduğunu deyib: "Xəstəxana faktiki olaraq xəstə ilə doludur, hamısı da ağır xəstələrdir. Yoluxma bu templə getsə, ümumiyyətlə vəziyyət çətinləşəcək."
N. Hüseynquliyev qeyd edib ki, xəstəxananın yoluxucu xəstəliklər şöbəsinin müdiri Telman Kəlbəliyev də virusa yoluxduğundan müalicə alır və tibb müəssisəsi növbəlilik sistemi ilə fəaliyyət göstərir: "Ümumiyyətlə xəstəxananın hər 3 mərtəbəsində ağır xəstələr olduğuna görə, növbəli iş qrafikinə keçilib. Həkimlər hamısı növbə ilə işə çıxır. Yenicə istifadəyə verilən modul tipli xəstəxana isə hələ fəaliyyətə başlamayıb".
Xatırladaq ki, xəstəxana 227 çarpayılıqdır.
Qeyd edək ki, Sumqayıtda koronavirusa yoluxanlar arasında müxtəlif sahənin insanlarına rast gəlinir. Virus aşkarlananlar arasında ölənlər də var.
Bu gün Sumqayıt şəhər İcra hakimiyyəti vəziyyətin ciddiliyini nəzərə alaraq şəhər sakinlərinə müraciət edib. Müraciətdə sakinlərin karantin qaydalarına riayət etmələri xahiş olunur.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
