Bildiyimiz kimi, fevralın 26-da Azərbaycan Respublikasının Prezidenti İlham Əliyev yerli və xarici media nümayəndələri üçün geniş mətbuat konfransı keçirdi. Mən ilk növbədə bir neçə çümlə ilə bu mətbuat konfransına münasibət bildirmək istəyirəm.Ölkə başçısı dörd saatdavam edən mətbuat konfransında 30-dan artıq jurnalistin 50-dən çox sualını cavablandırdı. Əslində bu mətbuat konfransının keçirilməsinə çox böyük ehtiyac var idi. Çünki 44 günlük İkinci Qarabağ Müharibəsindən sonra müəyyən suallar meydana çıxmışdı, bu suallar beyinlərdə kortəbii şəkildə dolaşmaqda idi və hər kəs öz dərk etdiyi şəkildə bu suallara cavab axtarmağa çalışırdı.. Möhtərəm cənab Prezidenthəm mətbuat konfransını keçirməklə bu suallara aydınlıq gətirdi, həm də məqsədli şəkildə ortaya atılan dezinformasiya xarakterli suallara belə, təmkinlə məntiqli və dəqiq cavablar verərək, Azərbaycana qarşı mənfi fikir formalaşdırmaq və yaymaq istəyənləri həqiqətin gücü ilə yerində oturtdu. Və dünya bir daha Azərbaycanın işinin haqq, mübarizəsinin ədalətin bərpa olunması naminə olduğuna əmin oldu.

 

 

Təbii ki, 44 günlük müharibədə qələbəni şərtləndirən əsas amil Azərbaycan Respublikasının Prezidenti, Ali Baş Komandan İlham Əliyevin torpaqlarımızın işğaldan azad olunması uğrunda apardığı ədalətli mübarizədə nümayiş etdirdiyi əsl dövlət rəhbəri məharəti və sərkərdəlik qətiyyəti idi. Müzəffər Azərbaycan Ordusunun yüksək döyüş hazırlığı və qələbə əzmi qələbəni bir az da tezləşdirdi. Paralel olaraq da böyük Atatürkün "Azərbaycanın sevinci bizim sevincimiz, kədəri bizim kədərimizdir” vəUlu öndər Heydər Əliyevin dahiyanə şəkildə irəli sürdükləri "Bir millət - iki dövlət" şüarının bu çətin dönəmdə nə qədər əhəmiyyət kəsb etdiyini bir daha gözlər önündə sərgilədi. Türkiyə Respublikasının Prezidenti Rəcəb Tayyib Ərdoğanın elə ilk günlərdən obyektiv və həqiqəti əks etdirən bəyanatları, atdığı qətiyyətli addımlar, düşünülmüş şəkildə və uzaqgörənliklə etdiyi diplomatik gedişlər Azərbaycanın işğal altında olan tarpaqlarını qaytarmaq uğrunda apardığı ədalətli müharibəsinin uğurlu gedişinə təkan verdi, xalqımıza və əsgərlərimizə böyük ruh yüksəkliyi bəxş etdi. Həmçinin Türkiyənin digər yüksək vəzifəli rəsmiləri birmənalı olaraq Azərbaycana dəstək verdilər. Bu, Azərbay­cana çox böyük siyasi və mənəvi dəstək olmaqla bərabər, həm də bütün dünyaya bir mesaj idi ki, kənarda dayanın, azərbaycanın haqq işinə mane olmayın və müdaxilə etməyin.

 

Azərbaycan-Türkiyə münasibətləri üç il, beş il ərzində formalaşan münasibətlər deyil, bu münasibətlər dərin və tarixi köklərə bağlıdır. Birincisi, bizi türkdilli dövlət olmağımız yaxınlaşır, eyni milli mənsubiyyətin daşıyıcılarıyıq. Eyni soykökünə, dilə, dinə, mədəniyyətə və digər bağlara malik olmağımız bizi dostlaşdırıb, doğmalaşdırıb, qardaşlaşdırıb, sevincli, kədərli günlərdə bir-birimizin yanında olmağımıza zəmin yaradıb. Qarşılıqlı etimad, yüksək səviyyəli əməkdaşlıq əsasında qurulan bu münasibətlər son 17 ildə hər iki ölkə rəhbərliyi tərəfindən həyata keçirilən düzgün, məqsədyönlü siyasətin məntiqi nəticəsi olaraq daha yüksək səviyyəyə çatıb və yeni mərhələyə daxil olub. Bütün sahələri əhatə edən qarşılıqlı əməkdaşlıq, hərbi-strateji tərəfdaşlıq, müharibə dövründə böyük siyasi və mənəvi dəstəyə çevrilmiş, döyüş meydanında böyük qələbənin əsas dayağına və hərəkətverici qüvvəsinə çevrilmişdir. Qeyd edim ki, eyni missiyanı da Azərbaycan Türkiyə ilə bağlı yerinə yetirir. Bu bir tərəfdən yuxarıda sadaladığım faktora bağlıdırsa, digər tərəfdən Türkiyənin həqiqət çarçısı olması ilə əlaqədardır. Çünki Türkiyə işğalçılıq siyasətindən uzaqdır, hara gedirsə özü ilə sülh aparır, əmin-amanlıq aparır, məzlumların haqq işini müdafiə edir və bunu da kişi kimi edir, heç kimdən çəkinmədən, qorxmadan, mərdi-mərdanə edir.

 

Bir məsələni də qeyd edim ki, əsl qardaşlıq nümunəsi olan sarsılmaz Azərbaycan - Türkiyə birliyi dost və tərəfdaş ölkələr üçün də bir çağırışdır. Dövlətlərarası münasibətlər nə qədər yaxşı olarsa, o ölkələrdə sülh və əmin-amanlıq da bir o qədər tez bərpa olunar. Əslində bu 44 günlük müharibədən Ermənistan özünə bir dərs çıxarmalı, ibrət almalı, təcavüzkar siyasətdən əl çəkməli, başqalarının torpağına göz dikməməli və haqq yoluna qayıtmalıdır. Çünki son 30 ildəki işğalçılıq siyasəti Ermənistanın özünü çətin vəziyyətə salmış, qonşu ölkələrdən tədric olunmasına, qarşılıqlı-faydalı əməkdaşlıqdan uzaq qalmasına səbəb olmuşdur. Bu da Ermənistanın iqtisadiyyatını çökdürmüş, ölkəni səfilliyə, dilənçiliyə sürükləmiş, ələbaxımlılığı həyat tərzinə çevirmişdir. Müharibənin sonlandırılması və əldə olunan üçtərəfli razılaşma, mən deyərdim ki, Ermənistan üçün bir fürsətdir. Çünki Ermənistan razılaşmaya sona qədər uyarsa, başqa sevdalara, xülyalara düşməzsə, özünü ağıllı apararaq, etibarlı qonşu statusunu qazanarsa, onda bunun müqabilində Azərbaycan, təbii ki, Ermənistanla bütün sərhədləri açar, kommunikasiyalar işlək mexanizmə çevrilər, beləliklə, bölgədə həm tammiqyaslı sülh və təhlükəsizlik bərpa olunar, həm də Azərbaycanın reallaşdırdığı qlobal və dünyaəhə­miyyətli layihələrə Ermənistan da qoşulmaqla, düşdüyü iqtisadi və siyasi bataqlıqdan özünü qurtarmış olar. Əslində,isrər Rusiya, istər İran, İstər Türkiyə, İstərsə də Gürcüstan arasındakı müəyyən anlaşılmazlıqların kökündə Ermənistanın özünü qeyri-konstruktiv aparması, mənasız və məntiqsiz iddialarla çıxış etməsi dayanır. Bu isə o deməkdir ki, əgər Ermənistan haqq yoluna gələrsə, bütövlükdə regionda sülh və əmin-amanlıq bərpa olunar, qarşılıqlı çəkişmələr öz yerini qarşılıqlı-faydalı əməkdaşlığa verər. Bu gün Türkiyə-Azərbaycan münasibətləri məhz bu məqsədə xidmət edir və əminliklə deyə bilərik ki, Azərbaycan-Türkiyə münasibətləri təkcə Azərbaycan üçün deyil, bütövlükdə region ölkələri üçün də böyük əhəmiyyət kəsb edir. Möhtərəm Prezidentimizin də dediyi kimi, "Biz əgər təkcə Zəngəzur dəhlizinə fikir versək görərik ki, bu, yalnız Rusiya, Azərbaycan, Türkiyə, İran, Ermənistanın maraqlarına cavab vermir, bu, qonşu ölkələrin maraqlarına da cavab verir. Yəni, Avrasiyanın yeni bir nəqliyyat damarı açıla bilər. Əgər bu müsbət meyillər üstünlük təşkil edərsə, əlbəttə ki, icra edilən hər bir layihə özündən sonra digər layihəni də gətirib çıxaracaq”.

 

Müharibənin bitməsi Azərbaycan-Türkiyə münasibətlərini, təbii ki, arxa plana keçirmədi. Müharibə başa çatandan dərhal sonra ərazilərin minalardan təmizlənməsində iştirak etmək və bizim istehkamçılara treninqlər keçirilməsi üçün Türkiyə Müdafiə Nazirliyindən 100-dən çox mütəxəssis ezam edilib. Həmçinin Ağdam rayonu ərazisində Rusiya-Türkiyə Monitorinq Mərkəzi yaradılıb. Bu Mərkəzin əsas məqsədi məqsədi post-müharibə dövründə pilotsuz uçuş aparatlarından da istifadə edərək monitorinq aparmaqdır ki, münaqişə zonasında hər hansı bir qarşıdurma olmasın, bölgədə sabitliyi qorunsun. Digər tərəfdən, Türkiyədən olan şirkətlər artıq həyata keçirilən layihələrdə yer alıblar. Strateji əhəmiyyətə malik Füzuli-Şuşa avtomobil yolunun inşası ilə bağlı türk şirkətləri artıq fəaliyyətdədirlər.Göygöl bölgəsindən Kəlbəcərə çəkilən yolda da türk şirkətləri fəaliyyət göstərirlər. Görüləcək işlərin həcmi çox böyükdür. Əminəm ki, azad edilmiş torpaqlarda bir şox sahələr üzrə - inşaat, yenidənqurma, infrastruktur və tarixi abidələrimizin bərpası işlərində, əsas etibarilə, Türkiyə şirkətlərini görəcəyik. Müdafiə sənayesi üzrə də Türkiyə ilə əməkdaşlıqlar davam etdirilir, yeni müqavilələr imzalanıb, Türkiyədə istehsal olunan ən müasir silah növlərinin Azərbaycana gətirilməsi üçün razılaşma əldə edilib.

 

Burda qeyd etdiyim fikirlərin məntiqi təsdiqi kimi, yazımı ölkə başçısı İlham Əliyevin yerli və xarici media nümayəndələri üçün keçirdiyi geniş mətbuat konfransında Türkiyə ilə bağlı söylədiyi fikirlərlə tamamlamaq istəyirəm: "Türkiyə müharibənin ilk günlərindən çox müsbət davranış göstərib – sülhə, sabitliyə hesablanmış davranış. Eyni zamanda, ilk günlərdən Azərbaycanın haqq işinə Türkiyə öz dəstəyini göstərmişdir.”

 

Rafiq Oday,

Əməkdar jurnalist

Xəbərdən istifadə edərkən istinad etmək vacibdir.