"Rusiyanın Müdafiə naziri, ordu generalı Şoyqunun İrana səfəri nəticəsində iki ölkə arasında imzalanan hərbi əməkdaşlıq müqaviləsi özündə çox ciddi məsələləri ehtiva edir”.
Bu sözləri Azərbaycan Respublikasının Prezidenti yanında Dövlət İdarəçilik Akademiyasının Siyası Araşdırmalar İnstitutunun direktoru Elman Nəsirov deyib.
Politoloqun sözlərinə görə, Şoyqunun İrana səfərinin ardından İranın Xarici İşlər nazirinin bu gün baş tutacaq Ermənistan səfəri arasında heç bir bağlantı yoxdur:
"Müqavilədə Rusiyanın İrana S-300 zenit raket kompleksi satışına başlaması ilə bağlı məsələ bundan sonra da istisna edilmir. Hər iki ölkə Qərb və ABŞ-ın sanksiyalarına məruz qalan dövlətdir və bu nöqteyi-nəzərdən də onları Qərbin təzyiqləri fonunda ortaq maraqlar birləşdirir. Belə bir vəziyyətdə isə indi İranın Xarici İşlər nazirinin Ermənistana səfəri ilə Şoyqunun İrana səfəri arasında ciddi paralel aparmağa ehtiyac yoxdur. Əgər Rusiyanın Müdafiə nazirinin ardınca İranın Müdafiə naziri Rusiyaya və yaxud Ermənistana səfər etsəydi, o zaman demək olardı ki, imzalanmış hərbi müqavilənin gizlin detallarında bununla bağlı müəyyən bir bənd var. Buna görə də İranın Xarici İşlər nazirinin Ermənistana səfərinə iki ölkənin əməkdaşlığı fonunda qiymət vermək daha düzgün olardı. Qeyd edim ki, Ermənistanın Baş naziri İrana səfəri zamanı qondarma erməni soyqırımı ilə bağlı İran prezidentini uydurma 100 illiyə dəvət edib”.
Politoloq bildirib ki, indiki halda səfər çərçivəsində həm qondarma soyqırım məsələsi, həm ikitərəfli münasibətlər, həm də enerji sahəsində əməkdaşlıq məsələlərinə yer ayrılacaq:
"Ancaq İranla Ermənistan arasında münasibətlər qurulmuş olsa da, heç bir real addım atılmayacaq. Bu, ilk növbədə Ermənistan bazarının həddindən artıq kiçikliyi, investisiya baxımından cəlb edici olmaması, ölkədəki qeyri-siyasi sabitlikdən irəli gəlir. Bu, İrəvanın Tehran üçün əhəmiyyət və aktuallığını azaldır. Hazırkı səfər sırf geosiyasi səbəblərdən qaynaqlanır”.
Xatırladaq ki, Ermənistanın Xarici İşlər naziri Edvard Nalbandyanın dəvəti ilə İran XİN-in rəhbəri Məhəmməd Cavad Zərif bu gün İrəvana gedəcək. Məlumata görə, yanvarın 27-də Ermənistan və İran xarici işlər nazirləri arasında danışıqlar, daha sonra isə birgə mətbuat konfransı keçiriləcək. (axar.az)
Xəbərdən istifadə edərkən istinad etmək vacibdir.
