Cəbhədə atəşkəsin hər gün dəfələrlə pozulmasına, hər iki tərəfdən itkilərinin olmasına rəğmən, daha ciddi və effektiv savaş informasiya məkanında gedir. Çünki hərb meydanındakı savaşdan fərqli olaraq informasiya savaşı konkret coğrafi ərazi və əhali qrupu ilə məhdudlaşmır. Dünyanın bütün nöqtələrində onu hiss etmək, hiss etdirmək olur. Bu savaş insanların şüurunun fəthi uğrundadır. Burada silah yox, söz hakimdir.

Ermənistan, dünya erməniləri informasiya müharibəsindən maksimum yararlanmağa çalışırlar. Və üstəlik bu müharibəni iki cəbhədə - Azərbaycana və Türkiyəyə qarşı aparırlar.

2015 həm Ermənistan, həm də dünya erməniləri ilə Azərbaycan və Türkiyə münasibətlərində, yaxud münaqişəsində xüsusi bir ildir. Daha çox ona görə ki, ermənilər yalançı erməni soyqırımı iddiasının 100 illiyini "təmtəraqlı" keçirməyə hazırlaşırlar.

Hazırda Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının nəzdində yaradılan İşçi Qrup Ermənistan prezidenti Serj Sarkisyanın hərbi cinayətkar kimi tanınması üçün kampaniyaya başlayıb. İşçi Qrup BMT Təhlükəsizlik Şurasına müraciət üçün internetdə "Sarkisyanın hərbi cinayətkar kimi tanınması məqsədilə 100 min səs" petisiyasını yaradıb. Petisiya həmçinin 20 yanvar hadisəsinə dünya ictimaiyyəti tərəfindən siyasi qiymət verilməsi məqsədini də daşıyır. Bu məqsədlərə çatılması üçün petisiyaya 100000 imza toplamaq lazımdır.  

 Petisiyaya qoşulmaq da çox sadədir. Amma, təəssüf ki, kampaniyanın başlamasından 10 günə yaxın vaxt  keçməsinə baxmayaraq hələ qoşulanların ümumi sayı 30 mini keçməyib. Bu, nəyin göstəricisidir? 

Axı, başqa vaxt əhali sayımızın 9 milyonu keçdiyini əda ilə bəyan edirik. Axı, 50 milyonluq xalq olduğumuzu dünyaya hayqırırıq. Axı, 300 milyonluq türk dünyasının körpüsü olduğumuzu fəxrlə söyləyirik.

Belə isə bu ötən müddətində 100 min səsi nə üçün toplaya bilməmişik?

Məgər sadə bir petisiyada iştirakımızın səviyyəsi bir meyar, bir göstərici deyilmi? Həm də, xoş olmayan bir göstərici...

Sən demə, milyonlarla, onmilyonlarla, yüzmilyonlarla ölçülən varlığımız əslində quru statistikadan başqa bir şey deyilmiş... 

P.S. Barı qalan vaxtdan maksimum istifadə edək. Sayta daxil olub email və ad-soyad yazdıqdan sonra "Sign” düyməsini klik edin.

https://secure.avaaz.org/en/petition/United_Nations_Security_Council_Recognize_Serzh_Sargsyan_the_President_of_Armenia_as_a_war_criminal_1/?aJghZib

(modern.az)