Hələ 42 yaşındaykən, dünyanın ən gənc prezidentlərindən biri olarn zaman ğzünün fenomenal idarəetmə qabiliyyətini nümayiş etdirməyə başlayan İlham Heydər oğlu Əliyev bu gün bağrından qopduğu xalqının etimadını layiqincə doğruldan bir liderdir. Ötən 18 ildə o, Azərbaycanı aydın üfüqlərə doğru addım-addım irəli aparıb. Özü də qürurla qalibiyyət zirvəsində qərar tutub.
Ulu Öndər Heydər Əliyevin layiqli siyasi varisi olan Azərbaycan Respublikasının Prezidenti, Azərbaycan Respublikası Silahlı Qüvvələrinin Müzəffər Ali Baş Komandanı İlham Əliyevin dərin elmi bilik və zəngin diplomatik təcrübəsini müxtəlif dünya liderləri, dövlət və hökumət başçıları öz çıxışlarında hər zaman yüksək qiymətləndirmişlər. Bunların içində ən mötəbər söz Ulu Öndər Heydər Əliyevə məxsusdur. Ulu Öndər öz siyasi varisini Azərbaycan xalqına təqdim edərkən təkcə onun atası kimi yox,böyük bir Xalqın atası kimi belə demişdir: "Üzümü Sizə - həmvətənlərimə tutaraq, qarşıdan gələn Prezident seçkilərində Prezidentliyə namizəd, mənim siyasi varisim, Yeni Azərbaycan Partiyası sədrinin birinci müavini İlham Əliyevi dəstəkləməyə çağırıram. O, yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir. Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər. İnanıram ki, mənim axıra çatdıra bilmədiyim taleyüklü məsələləri, planları, işləri Sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm”.
Ulu Öndər bu nəsihət və xeyir-duasını verərkən inanırdı ki,məhz onun davamçısı İlham Əliyev onun arzularını gerçəkləşdirəcək, məhz o, dədə-baba torpaqlarımızı işğaldan azad edərək Şuşa zirvəsinə qələbə bayrağını sancacaq. Belə də oldu. Ulu öndər yanılmamışdır. Onun siyasi varisi xalqın və milyonların sevgisini qazanmış, müzəffər ordusu ilə Şuşa şəhərinə daxil olub, orada şanlı bayrağımızı ucaldaraq ata nəsihətini həyata keçirmişdir.
İlham Əliyev artıq ömrünün altmışında müdrik yaşında bacarıqlı bir rəhbər kimi bütün dünyada tanınır. 18 ildə ölkəmizin tərəqqisi, xalqın rifahı naminə çox işlər görmüşdür. Mötəbər beynəlxalq tribunalardan haqq səsimizi ucaltmışdır. Ordu quruculuğunu ən ideal səviyyəyə qaldırmışdır. Nəhayət, 44 günlük möhtəşəm "Zəfər Yürüşü” sayəsində möhtəşəm tariximizin qızıl səhifəsini yaxmışdır.
Ötən il noyabrın 10-da təcavüzkar ölkənin hökumət başçısının onun üçün sırf kapitulyasiya sənədi olan üçtərəfli bəyanat imzalamağa məcbur olması Azərbaycanın hərbi, siyasi və diplomatik qələbəsi olaraq dünya hərb tarixində yeni bir səhifə təşkil edir. Bu, ərazilərimizin 20 faizini qəsb etmiş nankor qonşularımızın 30 ildən bəri orada möhkəmlənənək sülhyaratma prosesindən hər vasitə ilə yayınmaq və status-kvonu dəyişməz saxlamaq cəhdlərinin tam iflasa uğraması, Azərbaycanın isə ilbəil artan qüdrətinin parlaq nümayişi oldu.
Böyük Qələbə Prezident İlham Əliyevin illərcə, özü də böyük inamla həyata keçirdiyi ictimai-siyasi, sosial-iqtisadi inkişaf konsepsiyasının məntiqi yekunudur. Sonrakı mərhələdə qazanılan uğurlar bu qənaəti daha da möhkəmləndirib. "Sözümüz imzamızdır” fikrinin təsdiq möhürü olub.
Bu gün Azərbaycanda Müzəffər Ali Baş Komandanın doğum günü böyük bir bayrama çevrilmişdir. İlham Əliyevin tərcümeyi-halı əslində geniş ictimaiyyətə yaxşı məlumdur. Amma bir daha qeyd edək ki,o, Moskva Dövlət Beynəlxalq Münasibətlər İnstitutunun (MDBMİ) məzunudur. 1977-ci ildə MDBMİ-ni bitirdikdən sonra bu ali məktəbin aspiranturasına qəbul olub, 1985-ci ildə dissertasiya müdafiə edərək, tarix elmləri namizədi elmi dərəcəsi alıb. Həmin ali təhsil müəssisəsində dərs də deyib. Azərbaycana gələndən sonra isə vəzifə pillələrində inamla irəliləyib və ona həvalə olunan bütün vəzifələrdə şəxsi nümunə göstərib. 1995-ci və 2000-ci illərdə Milli Məclisə deputat seçilib. 2003-cü ildə Baş nazir vəzifəsinə təyin edilməsi ilə əlaqədar olaraq deputat səlahiyyətlərinə xitam verib. 1997-ci ildən Azərbaycan Milli Olimpiya Komitəsinin prezidentidir. İdmanın və Olimpiya hərəkatının inkişafında böyük xidmətlərinə görə Beynəlxalq Olimpiya Komitəsinin ali ordeni ilə təltif ediib. 1999-cü ildə Yeni Azərbaycan Partiyası sədrinin müavini, 2001-ci ildə sədrin birinci müavini, 2005-ci ildə isə partiyanın sədri seçilib. 2001–2003-cü illərdə Avropa Şurası Parlament Assambleyasında Azərbaycan Respublikası Milli Məclisinin nümayəndə heyətinin rəhbəri olub. 2003-cü ilin yanvarında Avropa Şurası Parlament Assambleyası sədrinin müavini, AŞPA-nın Büro üzvü seçilib. 2004-cü ilin aprelində AŞPA-nın fəaliyyətində fəal iştirakına və Avropa ideallarına sədaqətinə görə fəxri üzv diplomu və AŞPA medalı ilə təltif edilib. 2003-cü il 15 oktyabrda Azərbaycan Republikasının Prezidenti seçilib. Seçicilərin 76 faizdən çoxu İlham Əliyevin lehinə səs verib. 2008, 2013 və 2018-ci illərdə yenidən prezident seçilib. Son seçkilərdə səslərin 86,03 faizini toplayıb.
Hələ ilk seçkilərdə "Zəngin və qüdrətli Azərbaycan uğrunda” çağırışı ilə milyonları öz ətrafında toplayan İlham Əliyevin uğurlu daxili və xarici siyasəti sayəsində Azərbaycanda hüquqi və dünyəvi dövlət quruculuğu prosesi bugünədək inamla həyata keçirilir. Dövlət başçısının xidmətləri ilə Azərbaycanda demokratik prosesi sürətləndirən siyasi islahatlar dönməz xarakter alıb. "Mən bütün Azərbaycan xalqının, hər bir Azərbaycan vətəndaşının Prezidentiyəm. Mənim borcumdur ki, imkan daxilində hər bir vətəndaş inkişafa, yaxşılığa doğru irəliləyişi görsün və onu hiss eləsin” – fikri onun uğur formuludur.
Azərbaycan beynəlxalq əlaqələr, ikitərəfli münasibətlər sahəsində nümunəvi bir dövlətdir. Regionda liderlik mövqeləri durmadan möhkəmlənir. Ölkəmiz Qoşulmama Hərəkatında, Şərq tərəfdaşlığında və İslam Əməkdaşlıq Təşkilatında fəallığı ilə xüsusilə seçilir. Bu aspektdə qardaş Türkiyə ilə münasibətlər məxsusi yer tutur. Türkiyənin Prezidenti Rəcəb Tayyib Ərdoğan öz ölkəsinin daim Azərbaycanın yanında olduğunu dönə-dönə bildirib və əməldə sübuta yetirib. Bakıdakı Zəfər Paradında onun iştirakı isə Azərbaycanın heç də dünyada tək olmadığı barədə məlum güclərə verilən bir mesaj idi. Bu gün ulu öndərin "Bir millət – iki dövlət” şüarının təntənəsi bütün parlaqlığı ilə gözlər önündə cilvələnir. 2021-ci il iyunun 15-də müttəfiqlik münasibətləri haqqında imzalanmış Şuşa Bəyannaməsi möhtəşəm sənəd olmaqla həm Azərbaycan və Türkiyə, həm də region üçün çox önəmli tarixi hadisədir. Bu, Vətən müharibəsində böyük qələbənin parlaq əks-sədasıdır.
Prezident İlham Əliyevin "Azərbaycan 2030: sosial-iqtisadi inkişafa dair Milli Prioritetlər” strategiyasının bir istiqaməti də işğaldan azad olunmuş Qarabağın dirçəlişi prosesinə aiddir. Qarabağ və Şərqi Zəngəzurda bərpa-quruculuq işləri, necə deyərlər, bütün cəbhə boyu həyata keçirilir. Artıq azad nəfəs alan ərazilərimizin malik olduğu potensialın ölkənin ümumi iqtisadiyyatına yönəldilməsi dayanıqlı inkişafa böyük təkan verəcək. İndi oraya "Böyük Qayıdış” konsepsiyası sürətlə reallaşdırılır. Zəngəzur dəhlizinin açılması yönümündə irəliləyiş, sərhədlərin delimitasiya və demarkasıyasının qaçılmaz zərurətə çevrilməsi böyük diplomat olan cənab İlham Əliyevin ard-arda qazandığı qələbələr seriyasına aiddir.
Azərbaycan Prezidenti böyük qələbədən sonra Qarabağa düz 17 dəfə səfər edib. Orada icra olunan ilk layihə "Zəfər yolu”nun salınması olub. Səfər zamanı Prezidentin qədim Xudafərin körpüsünə gələrək onun üzərinə şanlı bayrağımızı sancmış və İranla 132 kilometrlik sərhədi bərpa etmiş müzəffər rəhbəri kimi həmin ərazidə qürurla gəzmişdir. Beləliklə gələcəyin hünər, tərəqqi eskizlərinin icrasına uğurlu start verilib.
Son 200 ildə Azərbaycan ancaq torpaqlarını itirməli olmuşdu. 2020-ci ildə isə məhz cənab İlham Əliyevin ali sərkərdəliyi sayəsində Azərbaycan ğrazi bütövlüyünü bərpa etmiş və erməni faşizminin belini qırmışdır. Elə bir bu fakt bəs edir ki, onun adı tarixdə əbədi qalsın. Xalq da buna yüksək dəyər verir və öz Prezidentini gözünün işığı, qəlbinin təpəri, sabahının təminatçısı sayır, Bizi qarşıda daha böyük zəfərlər, daha böyük bayramlar gözləyir.Ona grə də bu əziz gündə cənab prezident İlham Əliyevi təbrik edir, yeni zəfərlər arzulayırıq.
Yaşasın Azərbaycan Respublikasının Prezidenti!
Yaşasın Azərbaycan!
Hikmət Xəlilov,
YAP Masallı rayon təşkilatının Siyasi Şura üzvü
Xəbərdən istifadə edərkən istinad etmək vacibdir.
