Azərbaycan britaniyalı deputatın sanksiya tələbinə reaksiya verəcək.
Bununla bağlı Modern.az-a Azərbaycan-Böyük Britaniya parlamentlərarası əlaqələr üzrə işçi qrupunun üzvü Asim Mollazadə məlumat verib. Deputat leyboristlərin təmsilçisi Marqaret Hodcenin Azərbaycana sanksiya tətbiq edilməsi haqqında fikirlərini sərt şəkildə qınadığını bildirib:
"Bu yenə də bütün dünyaya nümayiş etdirdi ki, lobbiçiliklə məşğul olan, hansısa siyasi korrupsiyaya bulaşmış Avropa siyasətçiləri əslində Avropanın, öz ölkələrinin dəyərlərinə və maraqlarına ciddi zərbə vururlar. Onun fikirləri təəssüf doğurur və qəbuledilməzdir.
Marqaret Hodcenin yalan ittihamlarla dolu olan çıxışı əslində Britaniyanın strateji maraqlarına böyük zərbədir. Həmçinin insanlıq münasibətlərinin xaricindədir. Bu, siyasi korrupsiyanın və lobbiçiliyin təzahürüdür”.
Deputat qeyd edib ki, Azərbaycanın bu məsələyə mütləq reaksiyası olacaq:
"Həm Böyük Britaniya parlamentinə, həm xanımın üzv olduğu Leyboristlər partiyasına mövqeyimizi ifadə edəcəyik. Mənə elə gəlir ki, dünya üçün ağır günlərdə öz lobbi fəaliyyətini həyata keçirməyi üstün tutmaq utancverici addımdır”.
Qeyd edək ki, Britaniya parlamentində Ukrayna böhranı müzakirə edilərkən leyboristlərin təmsilçisi Marqaret Hodc (Margaret Hodge) xarici işlər naziri Elizabet Trassdan iki suala cavab istəyib. Əvvəlcə soruşub ki, Rusiya Dumasının üzvlərinə də sanksiyalar tətbiq edilə bilərmi?! İkinci sual isə belə olub: "Putinin səylərinə dəstək verən Qazaxıstan və Azərbaycanın da sanksiyalar siyahısına daxil edilməsi məsələsinə baxılırmı?”
Birinci sualı müsbət cavablandıran Britaniyanın xarici işlər naziri Elizabet Trass ikinci sualla bağlı Belarusu misal çəkərək bildirib ki, "Qazaxıstan və digər ölkələrlə bağlı məsələyə baxıla bilər”.
Xəbərdən istifadə edərkən istinad etmək vacibdir.
