Ermənistan Türkiyəyə diplomatik pasport sahibləri üçün quru sərhədinin açılmasını təklif edib.
Xeberle.com xəbər verir ki, bu barədə Ermənistan Xarici İşlər Nazirliyinin sözçüsü Vahan Hunanyan bildirib.
XİN rəsmisi quru sərhədlərinin açılmasına dair Türkiyəyə təkliflər irəli sürüb: "Tərəflər arasında ilkin anlaşma var ki, növbəti görüş Vyanada baş tuta bilər. İclasın vaxtı və yeri yekun təsdiqini alan kimi ictimaiyyətə düzgün məlumat veriləcək.
Əvvəlki normallaşma cəhdləri zamanı Ermənistanda və Türkiyədə həm danışıqlar, həm də hətta prezidentlər səviyyəsində görüşlər olub, amma bildiyiniz kimi, heç bir nəticə verməyib. Yəni, önəmli olan normallaşmaya nail olmaq üçün siyasi iradə və aydın, substantiv addımlar atmağa hazır olmaqdır. Biz hər ikisini nümayiş etdiririk".
"Erməni tərəfi cəsarətli addımların atılmasının zəruriliyi ilə tam razıdır. Biz dəfələrlə irəliləməyə hazır olduğumuzu göstərmişik, o cümlədən xarici işlər nazirimizin Antalya Diplomatiya Forumunda iştirakı və iqtisadi embarqonun ləğvi ilə bunu göstərmişik. Ermənistanla Türkiyə arasında uçuşların bərpası mühüm ikitərəfli addım olub.
Biz əminik ki, irəliyə doğru getməyin yeganə yolu davamlı, aydın addımlardan ibarətdir. Məsələn, biz Türkiyə tərəfinə birinci mərhələdə diplomatik pasportlara malik şəxslər üçün quru sərhədinin açılmasını təklif etdik, lakin Türkiyə tərəfi gecikdirir. İnanırıq ki, bu, kiçik, lakin əsaslı, ən əsası məntiqi addım olardı. Ümid edirik ki, bu məsələdə nəticə əldə etmək mümkün olacaq”, - Ermənistan rəsmisi vurğulayıb.
Xəbərdən istifadə edərkən istinad etmək vacibdir.
