Azərbaycan xalqı qədim və zəngin qəhrəmanlıq ənənələrinə malikdir. İşğalçı düşmənə qan udduran sərkərdə Tomris, azadlıq uğrunda yorulmadan mübarizə aparan Cavanşir, Ərəb Xilafıtini lərzəyə salaraq, onlara qarşı 21 il mərdanə mübarizə aparan Babək, cəmi 14 yaşında Təbrizi azad edib, Səfəvilər dövlətini yaradan Şah İsmayıl Xətai, daha neçə-neçə cəsur oğul və qızlarımız qəhrəmanlıq səlnaməmizin ən parlaq səhifələrini yazıblar. Bu baxımdan XXI əsr tariximiz də istisna olmadı. 44 günlük Vətən savaşında Azərbaycan əsgərinin göstərdiyi qəhrəmanlıqlar dillərdə dastan oldu. Xüsusilə Füzuli rayonunda keçilməz müdafiə xətləri yaradan erməni işğalçı qüvvələri torpaqlarımızı əbədi olaraq işğal altında saxlayacağını düşünürdü. Lakin düşmən Azərbaycan oğullarının vətən torpağının azadlığı uğrunda necə böyük qəhramanlılara, fədakarlıqlara hazır olduqlarını unutmuşdu. Füzulinin azad edilməsi uğrunda gedən döyüşlərdə Azərbaycan ordusu misilsiz qəhrəmanlıqlar göstərdi. Heç bir düşmən səngəri öz doğma torpağı uğrunda döyüşən əsgərimizi dayandıra bilmədi. 2020-ci il 17 oktyabr tarixində dahi şairimiz Füzulinin adını daşıyan şəhərimiz düşmən işğalından azad edildi. Ordumuzun Füzuli zəfəri haqqında ilk müjdəni xalqa Müzəffər Ali Baş Komandan İlham Əliyev çatdırdı.
Qalib xalqımız artıq tam əmin ola bilər ki, Füzuli rayonu yeni inkişaf mərhələsinə qədəm qoyub. Ölkə prezidenti Cənab İlham Əliyev Füzuli rayonunun bərpasına xüsusi həssaslıqla yanaşır. Təsadüfi deyildir ki, 44 günlük Vətən müharibəsindən sonra dövlət başçımız iki dəfə - 29.08.2021-ci və 26.10.2021-ci il tarixlərində Füzuli rayonuna səfər edib. Müzəffər Ali Baş Komandan İlham Əliyevin rəhbərliyi ilə Füzulinin bərpası istiqamətində çox böyük işlər görülür. Cəmi 8 ay ərzində müasir standartlara cavab verən Füzuli beynəlxalq hava limanı inşa edilmişdir. Dünya praktikasında bəlkə də ilk belə haldır ki, tamamilə minalanmış ərazidə qısa zaman ərzində belə bir hava limanı tikilmişdir. Füzulidə elektirik yarımstansiyası açılmış və buradan Şuşa şəhərinə ayrıca xətt çəkilmişdir. Dövlətyarlı kəndinin inkişaf konsepsiyası təsdiq olunmuş və inşasına başlanılmışdır. "Ağıllı kənd” konsepsiyası əsasında Dövlətyarlı kəndində böyük, müasir və bütün lazımi şəraitlə təmin olunmuş yaşayış məntəqəsi yaradılacaqdır. Həyata keçirilən belə böyük bərpa-quruculuq işlərinin bir məqsədi var. Ən qısa zaman ərzində keçmiş məcburi köçkünləri öz doğma torpaqlarına qaytarmaq. Deməli artıq "Böyük Qayıdış” xalqımızın ümummilli arzusu kimi reallaşmaqdadır.
İstər Füzuli rayonunda, istərsə də işğaldan azad edilmiş digər ərazilərimizdə vandal ermənilər tərəfində törədilmiş dəhşətli dağıntılar da diqqətdən kənarda qalmamalıdır. Füzuli, Ağdam, Cəbrayıl, Zəngilan, Qubadlı kimi şəhərlərimiz və daha neçə-neçə yaşayış məntəqələrimiz vəhşi düşmən tərəfindən tamamilə dağıdılmış və yer üzündən silinmişdir. Artıq hətta xarici müşahidəçilər belə Ağdamı "Ruhlar şəhəri” adlandırırlar. Ölkə prezidentinin də qeyd etdiyi kimi, Füzulidə Azərbaycan bayrağını sancmaq üçün bir salamat bina belə yox idi. Belə vəhşiliklər törətmiş cinayətkar Ermənistan dövləti beynəlxalq məhkəmələrə cəlb olunmalıdır. Dünya birliyindən bu məsələdə ədalətli mövqe gözləyirik. Tarixi ədalətin qalib gələcəyinə inanırıq.
Cavid Məmiyev
YAP Sumqayıt şəhər təşkilatının sədr müavini
Xəbərdən istifadə edərkən istinad etmək vacibdir.
