Zəngilan rayonu ölkəmizin gözəlliyi ilə göz oxşayan, ruha xoş ovqat bəxş edən bir yaşayış məntəqəsi olması ilə yanaşı yerləşdiyi coğrafi mövqe baxımından çox mühüm strateji əhəmiyyətə malikdir. Təsadüfi deyil ki, "Böyük Qayıdış” adlandırdığımız o möhtəşəm hadisə - ilk "Ağıllı kənd” pilot layihəsinin icrası da məhz Zəngilanda gerçəkləşdi. Zənnimcə düşmənlə sərhəddə yerləşən bir rayonun ən qısa müddətdə yenidən qurulmasına , infrastrukturuna bu qədər vəsaitin xərclənməsi həm qələbəmizin daimiliyinin göstəricisi həm də bizə hədə-qorxu gəldiyini düşünən aşkar və "gizli” düşmənlərə verilən mesajdır-bir növ göz dağıdır.
Bir neçə gün bundan öncə dünya ictimaiyyətinin diqqəti yenidən Azərbaycanın dilbər guşəsi olan Qarabağa yönəlmişdi. İşğaldan azad edilmiş Zəngilan rayonunda ölkə başçısının "Ağıllı kənd” layihəsi ilə eyni gündə təməlini tökdüyü beynəlxalq hava limanının artıq açılış mərasimi keçirilirdi. Mərasimdə qardaş Türkiyə Cümhuriyyətinin başçısı Rəcəb Tayyib Ərdoğanın iştirakı marağı daha da artırmışdı. Xatırladaq ki, bu hava limanı işğaldan azad olunan ərazilərimizdə sayca ikincisidir. Ötən il oktyabrın 26-da Füzuli Beynəlxalq Hava Limanının açılış mərasimi oldu. Həmin mərasimdə də qardaş ölkə Prezidenti Rəcəb Tayyib Ərdoğan iştirak etmişdi. Hətta hörmətli Prezident həmin aeroportun ilk əcnəbi dövlət başçısı sərnişini oldu. Üstündən bir il keçməmiş Qarabağda növbəti hava limanının istifadəyə verilməsi Azərbaycanın iqtisadi qüdrətinin bariz nümunəsidir.
Zəngilan Beynəlxalq Hava Limanı Qarabağdan və Şərqi Zəngəzurdan dünyaya açılan hava limanıdır. Bu hava limanı Qarabağın mühüm nəqliyyat qovşağına çevrilməsini şərtləndirən əsas obyektlərdəndir. Həmçinin, bu hava limanı Zəngəzur dəhlizinin hava nəqliyyatı infrastrukturu ilə gücləndirilməsi baxımından strateji əhəmiyyət kəsb edir. Görülən işlərin sürəti buranın beynəlxalq nəqliyyat-logistika mərkəzinə çevriləcəyi günü yaxınlaşdırmaqdadır.
Zəngilan Beynəlxalq Hava Limanı işğaldan azad olunan ərazilərdə Füzulidəki hava limanından sonra istifadəyə verilən beynəlxalq statuslu ikinci aeroportdur. Üçüncü hava limanı isə Laçın rayonunun ərazisində inşa olunur. Müasir dünya tələblərinə cavab verən beynəlxalq aeroportun terminalı saatda 200 sərnişinə xidmət göstərmək imkanına malik olacaq. Aeroportda tam avtomatlaşdırılmış hava hərəkətinə nəzarət və aviasiya rabitəsi sistemləri ilə təchiz olunmuş Hava Hərəkətini İdarəetmə Qülləsi tikilib.
Onu da qeyd edim ki, Zəngilan aeroportunun açılış mərasimi Qarabağ və Şərqi Zəngəzur üçün çox önəmli bir günə – Zəngilan şəhərinin işğaldan azad olunmasının ikinci ildönümünə təsadüf edirdi. Düz iki il əvvəl erməni işğalına son qoyuldu. Prezident, Ali Baş Komandan İlham Əliyevin rəhbərliyi ilə Azərbaycan Ordusu Zəngilan şəhərini işğaldan azad etdi. Belə bir şad gündə Türkiyə Prezidentinin Azərbaycanda, Zəngilanda və Cəbrayılda olması iki ölkə arasında dostluq və qardaşlığın əbədiliyinin göstəricisidir. İkinci Qarabağ müharibəsindən sonra Türkiyə-Azərbaycan qardaşlığı, birliyi daha yüksək pilləyə qalxıb. Azərbaycan və Türkiyə bayraqları bir yerdə qürurla dalğalanır. Bu, babalarımızdan qalan mirasdır, onların vəsiyyətidir.
Açılış mərasimində iştirak edən qardaş Türkiyə Prezidenti Rəcəb Tayyib Ərdoğan işğaldan azad edilən qədim Azərbaycan torpaqlarında bir il ərzində ikinci hava limanının açılışını yüksək qiymətləndirdi. Vurğuladı ki, ikinci hava limanını, həqiqətən, müasir dünyanın müşahidə etdiyi şəkildə ən müasir hava limanlarından biri olaraq açmaq bu qədər çətin dövrdən sonra hər ölkənin bacara biləcəyi bir iş deyildir. Ermənilərin viranə qoyduqları əraziləri göstərən qardaş ölkə Prezidenti dedi ki, görəsən ATƏT, Avropa İttifaqı buralara niyə gəlmirlər? Çünki öz üzqaralarını görəcəklər, Qərbin etdiklərini görəcəklər. Onlar burada dəstəklədikləri həmin işğal dövründə Cəbrayılı, Qarabağın digər bölgələrini nə hala gətirdiklərini görəcəklər. Təbii ki, bunları görmək istəmirlər. Əslində, onlar nələr törədildiyini bilirlər.
O torpaqlara sanki ikinci can qayıdır, yeni nəfəs duyulur. Görülən işlərin sürətindən hiss edirik ki, Qarabağ, Şərqi Zəngəzur tezliklə öz gözəlliyinə qovuşacaq-cənnətə çevriləcək!
Elvin Əlizadə,
YAP Sumqayıt şəhər təşkilatının məsləhətçisi
Xəbərdən istifadə edərkən istinad etmək vacibdir.
