Rusiya tərəflər arasında etimadın yaradılması məqsədilə Azərbaycan və Ermənistanla üçtərəfli parlamentlərarası təmaslara başlamaq üçün məsləhətləşmələrə start verib.
Xeberle.com bildirir ki, bu barədə Rusiya Federasiya Şurasının sədr müavini Konstantin Kosaçev deyib.
"Dünənki birgə bəyanatda Rusiya, Azərbaycan və Ermənistan liderləri digər məsələlərlə yanaşı, ictimaiyyət nümayəndələri, ekspertlər arasında dialoqun davam etdirilməsi üçün Azərbaycan Respublikası ilə Ermənistan Respublikası arasında müsbət atmosferin yaradılmasının vacibliyini vurğulayıblar. Rusiyanın yardımı ilə icmalar və dini liderlər, eləcə də iki ölkə xalqları arasında etimadın möhkəmləndirilməsi məqsədilə üçtərəfli parlamentlərarası təmasların başlanması üçün işlər görülür”, - deyə Kosaçev teleqram kanalında yazıb.
Qeyd edək ki, oktyabrın 31-də Azərbaycan Respublikasının Prezidenti İlham Əliyevin Rusiya Federasiyasının Prezidenti Vladimir Putin və Ermənistan Respublikasının baş naziri Nikol Paşinyan ilə görüşü olub. Görüş Rusiyanın Soçi şəhərində baş tutub. İki saatdan artıq davam edən danışıqlardan sonra liderlər tərəfindən birgə bəyanat qəbul edilib.
Xəbərdən istifadə edərkən istinad etmək vacibdir.
