"Noyabrın 25-də Bakıda, ADA Universitetində "Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfrans keçirilib. Azərbaycan Respublikasının Prezidenti cənab İlham Əliyev konfransda mühüm mesajlar verdi.
ADA Universiteti və Beynəlxalq Münasibətlərin Təhlili Mərkəzi tərəfindən təşkil olunan sayca 3-cü konfransda regionda baş verən hadisələr, postmüharibə dövründə sülh quruculuğu və yenidənqurma işləri əsas müzakirə mövzusu oldu".
Xeberle.com xəbər verir ki, Milli Məclisin deputatı Müşfiq Məmmədli qeyd edib ki, dövlət başçısının bildirdiyi kimi, istənilən genişmiqyaslı layihənin icrası üçün ən önəmli elementlərdən biri sabitlikdir: "Azərbaycan artıq uzun müddətdir ki, sabitlik və iqtisadi inkişaf naminə bölgədə bütün addımları atır. Eyni zamanda Dünya dövlətləri ilə münasibətlərdə ən etibarlı tərəfdaşdır. Buna misal olaraq Azərbaycanın Qoşulmama hərəkatına üzv ölkələrlə münasibətlər, Ərəb ölkələri ilə tərəfdaşlıq, Avropanın bir çox ölkələri ilə yaradılan ikitərəfli əlaqələri söyləmək olar. Azərbaycan istər daxildə istərsə də xaricdə bu mühüm strategiyanı davam etdirəcək. Çünki əldə olunan bu nəticənin memarı möhtərəm prezidentimiz cənab İlham Əliyevdir!"
Xəbərdən istifadə edərkən istinad etmək vacibdir.
