Fransa Senatı noyabrın 29-u Azərbaycana qarşı sanksiyaların tətbiqini nəzərdə
tutan qətnamə qəbul edib. Senatın 295 üzvü sənədin leyhinə, 1 üzvü isə əleyhinə
səs verib. Fransa Senatı Azərbaycandan öz silahlı qüvvələrini "suveren Ermənistan
ərazisindən geri çəkməyi və Ermənistanın ərazi bütövlüyünə hörmək etməyi"
tələb edir. Qətnamədə, həmçinin "erməni hərbi əsirlərin azad olunması, qaz
nəqlinə embarqo tətbiq edilməsi, qondarma "Dağlıq Qarabağ Respublikasının"
tanınması, eləcə də Ermənistanın müdafiə qabiliyyətinin yüksəldilməsində mümkün
dəstəyin verilməsi" əksini tapıb.
İlk növbədə qeyd etmək istərdim ki, Fransa Senatı tərəfindən qəbul edilən
sənəd heç bir hüquqi qüvvəyə malik deyil. Fransa tərəfindən bu addımın
atılmasını isə normal qəbul edək. Ona görə ki, illərdir Azərbaycana qarşı
tutduqları mövqe hər birimizə bəllidir. Qətnamədə qeyd olunur ki, Azərbaycan
Ermənistan torpaqlarından geri çəkilməlidir. 30 ildir Azərbaycan torpaqlarını nəyin
ki işğal edən, hətta qanunsuz şəkildə talan edən, onun sərvətlərini mənimsəyən,
vaxtı ilə orada yaşamış 1 milyon insanın bütün hüquqlarını tapdalayan terrorçu
erməni hökümətinə güldən ağır söz deməyən Fransadan bundan artıq nə gözləmək
olar? Qaz nəqlinə embarqo qoyulması istəyi isə sadəcə absurd və gülməlidir. Son
illərdə onsuz da enerji sarıdan əziyyət çəkən Avropanı şam ümidinəmi qoymaq istəyir
Fransa?! Qondarma "Dağlıq Qarabağ Respublikası”nı tanımaq istəyinə gəldikdə,
möhtərəm prezidentimiz 44 günlük şanlı müharibə dövründə qeyd etdiyi kimi "Əgər
ürəkləri çox istəyirsə Marseldə ermənilərə muxtariyyət verə bilərlər”! Qarabağ
Azərbaycanın ayrılmaz hissəsidir! Bu bütün qanun və beynəlxalq təşkilatların qəbul
etdikləri qərar və qətnəmələrdə öz əksini tapmışdır. Azərbaycan suveren dövlətdir
və heç bir ölkəyə onun ərazisində qanunsuz addımlar atmasına izn verməyəcək,
qarşısını qətiyyətlə alacaq! Buna bizim istər iqtisadi, istər hərbi gücümüz yetərlidir.
Fransızlar yaxşısı budur, arxaya boylansınlar və tarixdə etdikləri cinayətlərə
görə ən azından utansınlar. Revanşist erməni qüvvələrinə dəstək vermək istəyi
iflasa uğrayacaq. Fransa bölgədə sülhün bərqərar olmasını istəsəydilər, məsələyə
qərəzsiz yanaşaraq hərbi dəstək yox, sabitliyi qorumaq üçün töhfə verərdilər.
Müşfiq Məmmədli
Milli Məclisin deputatı
Xəbərdən istifadə edərkən istinad etmək vacibdir.
