Ölkəmizdə rəsmi səfərdə olan Rusiya Federasiyasının Stavropol vilayətinin qubernatorunun müavini, vilayətin iqtisadi inkişaf naziri Andrey Murqanın başçılıq etdiyi nümayəndə heyəti Sumqayıt Texnologiyalar Parkında (STP) olub.
Xeberle.com xəbər verir ki, STP-nin mətbuat xidmətindən AZƏRTAC-a bildiriblər ki, qurumun baş direktoru Emin Məmmədov qonaqlara Azərbaycan Prezidentinin təşəbbüsü ilə ölkədə müxtəlif təyinatlı sənaye parklarının yaradılması istiqamətində həyata keçirilən tədbirlər barədə ətraflı məlumat verib. Qeyd edib ki, 2009-cu ildən fəaliyyət göstərən Sumqayıt Texnologiyalar Parkında yaradılmış istehsal sahələrinin potensialı Azərbaycan iqtisadiyyatının qeyri-neft sektorunun inkişafının bariz nümunəsidir.
Qonaqlar əvvəlcə hazırda fəaliyyət göstərən zavodlarla tanış olub, onlara istehsal prosesi haqqında ətraflı məlumat verilib. Bildirilib ki, qısa müddətdə Cənubi Qafqazda unikal müasir texnopark yaradılıb. Artıq 17 zavod işə salınıb və qısa bir zamanda daha üç müəssisə də istifadəyə veriləcək.
Daha sonra nümayəndə heyəti ilə keçirilən ikitərəfli görüşdə texnoparkın baş direktoru gələcəkdə STP-nin məhsullarının Stavropol bazarına çıxarılması perspektivləri, iqtisadi əməkdaşlıq əlaqələri haqqında danışıb, istehsal prosesi ilə bağlı qonaqları maraqlandıran sualları cavablandırıb.
Nümayəndə heyətinin rəhbəri Andrey Murqa müəssisənin iş prosesini maraqla izlədiklərini və Sumqayıt Texnologiyalar Parkının onlarda xoş təəssürat yaratdığını deyib. O, Azərbaycan ilə Rusiyanın Stavropol vilayəti arasında əməkdaşlığın müxtəlif sahələrdə, o cümlədən qeyri-neft sektorunda daha da inkişaf etdirilməsi üçün böyük potensialın və qarşılıqlı marağın olduğunu vurğulayıb. STP rəhbərliyini ilin sonunda Stavropol vilayətində keçirilməsi planlaşdırılan Rusiya-Azərbaycan biznes-forumunda iştirak etməyə dəvət edib.
Xəbərdən istifadə edərkən istinad etmək vacibdir.
