(Yazı Şəhidlərimizin Sumqayıt Şəhidlər Xiyabanında dəfn olunma ardıcıllığı ilə verilib).

-------------------------------------

HƏŞİMOV FƏRRUX MİRZƏMMƏD oğlu

(Kapitan-leytenant)

Qısa arayış: HƏŞİMOV FƏRRUX MİRZƏMMƏD oğlu 24 mart 1988-ci ildə Sumqayıt şəhərində anadan olub. Evin tək oğlu olan F.Həşimov 3-cü sinfəcən Sumqayıt şəhər Təbiət Elmləri Təmayüllü gimnaziyda oxuyub. 3-cü sinifdən təhsilini Sumqayıt şəhər 11 saylı tam orta məktəbdə davam etdirib. Doqquzillik təhsildən sonra, 2001-2006-cı illərdəC.Naxçıvanski adına Hərbi Liseydə, 2006-2010-cu illərdə Azərbaycan Ali Hərbi Dənizçilik Məktəbində təhsil alıb. Daha sonra təhsilini H.Əliyev adına Ali Hərbi Məktəbində ("Zabitlər kursu”) davam etdirib.

F.Həşimov ali təhsilin tamamında "Leytenant” rütbəsi ilə Hərbi Dəniz Qüvvələrində xidmətə başlayıb. Üçillik xidmətdən sonra, "Baş leytenant” rütbəsi ilə, 2016-cı ildə Hərbi Dəniz Qüvvələrinin Xüsusi Təyinatlı Qüvvələrinə imtahan verərək kursa qatılıb. Kursu uğurla bitirdikdən sonra gənc zabit HDQ-nin XTD-nin üzvü olub.

F.Həşimov 2016-cı ildə Şanlı Aprel döyüşlərində iştirak edib.

2018-ci ildə "Kapitan” rütbəsi alan F.Həşimov, HDQ-nin "Su Altı Hücum” (SAH) XTQ-nin "Qrup komandiri” vəzifəsinə təyin olunub və "Kapitan-leytenant” rütbəsinə yüksələrək xidmətinə davam edib.

F.Həşimov, xidməti dövründəki uğurlarına görə, bir çox mükafatlara sahib olub. O, 12 il (2008-2020) qüsursuz xidməti ərzində "Azərbaycan Silahlı Qüvvələrinin 90 illiyi” və "Azərbaycan Silahlı Qüvvələrinin 95 illiyi”, "Azərbaycan Ordusunun 100 illiyi” Yubiley medalları və III dərəcəli "Qüsursuz xidmətə görə” medalı ilə təltif edilib. Xarici ölkələrdə bir sıra təlimlərdə iştirak edib, Sertifikat, Fəxri Fərman və Diplomlarla təltif olunub. Həmçinin paraşüt təlimi keçib, üzgüçülüyü bitirib.

Ailə:Həşimovlar ailəsi ata, ana, bir bacı və bir qardaşdan ibarət olub. Valideynlər uzun müddət dövlət müəssisəsində çaışaraq, övladların düzgün tərbiyəsi, vətənpərvər ruhda böyüməsi üçün əllərindən gələni ediblər. Cəmilə xanım işləməklə yanaşı, ev qayğıları ilə, uşaqların dərsləri ilə maraqlanar, onların cəmiyyətdə doğru-düzgün mövqe tutmaları üçün əlindən gələni edərdi. O, qızı Lətifənin və oğlu Fərruxun ən yaxın dostu, sirdaşı idi.

F.Həşimov 2015-ci ildə türklərin snayper kurslarında təhsil alanda Fəxriyyə xanımla tanış olur. Könlünə yatan, sevib-bəyəndiyi xanımla ailə qurduqdan sonra, onların bir oğlu dünyaya gəlir və adını "Hüseyn” qoyurlar. Oğlunu dünyalarca sevən atanın bütün xəyal və arzuları onunla bağlı olur.

Fərrux dənizi çox sevdiyindən, dənizə baxmaqdan, onu saatlarca seyr etməkdən doymadığından, ipoteka ilə yeni mənzil götürmək istəyən zaman, evi dənizə yaxın ərazidən alır. Nə Fərrux dənizdən, övladından doydu, nə də ki, dənizlə balaca Hüseyn Fərruxdan doydu...

Fərrux dilinə və dininə bağlı insan idi. Vaxtında namazını qılar, oruc tutardı. Azərbaycandakı bütün ziyarətgahlarda olmuşdu. Zamanı olanda müqəddəs Quran kitabını əlinə alar və asta səslə oxuyardı.

Doğma ana dilinin gözəlliyinə, zənginliyinə vurğun olan Fərrux, hər kəsdən bu dilə hörmət bəsləməsini istəyərdi. Rus dilində danışan bir uşaq, böyük, fərq etməz, görəndə deyirdi, "niyə öz ana dilində danışmırsan?”. Bir çox dillərin öyrənilməsini müsbət qarşılasa da, Vətənində öz dilində danışmağa üstünlük verərdi.

Qəhrəmanımız təbiətcə geniş qəlbli, mehriban, dosta yanan, dostcanlı idi. Dost yolunda canını verərdi. 2020-ci ildə Novruz bayramında axır çərşənbədə ona bir günlük icazə verilir. Sonuncu icazəsində Aprel döyüşlərində şəhid olmuş dostunun məzarını və ailəsini ziyatət etmək üçün Lənkarana gedir.

Hər zaman öz üzərində çalışar, biliyini, savadını artırardı. Təhsilini davam etdirməyi, təlimlərə qatılmağı planlaşdırmışdı.

Bir az konservativ, bir az ciddi xarakterli insan idi. Hər yerdə deyib-gülməzdi. Çox az adam onun güldüyünü görərdi. Ancaq çox səmimi olduğu dostlarının yanında qıyqacı gülümsəyərdi.

Fərrux asudə vaxtlarında mütaliə etməyi sevərdi. Fəlsəfi və tarixi kitabları oxuyar, hərbi, tarixi, döyüş filmlərini maraqla izləyərdi. Yeniyetməlik dövründə boksla məşğul olmuşdu. Hərbidə müntəzəm təlimlərdə olar, normativləri uğurla verərdi.

-----

Vətən müharibəsi başlananda Fərruxun da sevinci yerə-göyə sığmır. Nəhayət, torpaqlarımız düşməndən azad olunacaq,hər kəs dədə-baba torpaqlarına qayıdacaq,.. ən əsası isə, şəhidlərimizin, zülm görmüş günahsız insanların qisası alınacaqdı.

II Qarabağ savaşı başlayan gün - sentyabr ayının 27-si 2020-ci il tarixindən Hərbi Dəniz Qüvvələrinin Xüsusi Təyinatlılarının hərb yolu Cəbrayıl rayonunun Lələtəpə yüksəkliyindən başladı. Yüksək əhval-ruhiyyə ilə mübarizəyə qalxanların arasında kapitan Fərrux Həşimov da var idi. O, silahdaşlarını ruhlandırır, "inşallah, Qubadlını alaq, qurban kəsəcəm”deyirdi. Yoladaşları da zarafatla soruşurdılar: "Fərrux, bəs bu qurbanlığı haradan gətirəsən?”. O, fikirləşmədən cavab verirdi ki, "neynirsiz, o, mənlikdir”.

25 Oktyabr 2020-ci il Fərruxun ata-baba yurdunun - Qubadlının işğaldan azad olunduğu gün onun sevincinin həddi-hüdudu olmur. Qubadlı alınır və orada qəhərmanımızın arzuladığı kimi, Azərbaycan bayrağı dalğalanır. Səhərisi gün döyüş yoldaşları görürlər ki, uzaqdan gələn Fərruxun çiynində bir qoç var. O, sözünün üstündə durmuş, yaxın kəndlərin birindən qoçu tapıb gətirmişdi...

F.Həşimov müharibədə öz qrupu ilə birlikdə iştirak edir. Düşmənə qarşı 1 ay 3 gün qəhrəmancasına mübürizə apararaq, Cəbrayıl, Füzuli, Qubadlı və Xocavənd rayonlarının alınması fəfakarlıq göstərir.

Qayğıkeş, diqqətcil komandir döyüşçüləri üçün narahat olur, dəstəsinin hər bir üzvünü qorumağa çalışırdı. Hər çətin yolu özünə seçir, ən ağır əməliyyata özü gedirdi. Hətta döyüş yoldaşları da deyərdilər ki, "komandir, nə qədər olar hər şeyə "mən”, hər yerə "mən” demək?”. Döyüşə gedəndə də, özünü irəli atar, arxadan gələn dəstəni, yaxud köməyi gözləməzdi. Kimsə "komandir, gözləyək gəlsinlər” desəydi, həmin an "yox, onlar gəlincə biz alacağıq” söyləyərdi.

31 Oktyabr 2020-ci il tarixində Xocavənd rayonunun "Qırmızı Bazar”adlanan ərazisində vacib yüksəkliyin alınması uğrunda qızğın döyüşlər gedir. İgidliyi, şücaəti ilə düşmənə qan udduran komandir döyüş vaxtı, qığılcım kimi yağan atəşlərə baxmayaraq, yaralı yoldaşını döyüş meydanından çıxartmaq istəyən zaman mənfur düşmənin snayper gülləsindən həlak olaraq ən uca məqama - Şəhidlik Zirvəsinə ucalır.

Bu döyüşdə 60 nəfərlik döyüşçü dəstəsindən 9 nəfər şəhid olur. Onlardan biri də yeganə zabit olan Fərrux Həşimov idi.

Varlığı qədər bağlandığı, sevdiyi doğma anasına "İncimə, öncə Vətən, sonra sən”, oğluna "bəlkə səni böyütmək mənə nəsib olmayacaq, amma bir ömür mənimlə fəxr edəcəksən” deyəcək qədər Vətən aşiqi olan bir oğul elə Vətən yolunda ölümün gözünə dik baxaraq, Tarixin qanlı səhifələrini qızıla boyadı. Allah dərgahında Cənnətin sevimli sakininə cevrildi FƏRRUX HƏŞİMOV!

Fərrux Həşimov ailəsinə bağlı, qayğıkeş, diqqətcil olmaqla bərabər, balaca Hüsynlə nəfəs alardı. Arzularının çoxu oğluyla bağlı idi. İstəyirdi, böyüyəndə dənizçi olsun. Həmişə oğlunu oynadanda deyərdi: "Sən çox böyük sərkərdə olacaqsan!”. Atanın oğlu ilə ilk gəzinti yeri Sumqayıt Şəhidlər Xiyabanı olardı. Burada oğlunu bağrına basar, qulaqlarına pıçıldayardı: "Atanı gəlib burada görəcəksən, burada atanın qardaşları yatır. İnşallah, müharibə olacaq və mən də şəhid oacam. Qubadlını alacam, onun Milli Qəhrəmanı olacam!”. Dünyadan bixəbər körpə isə maraqla atasına baxar və gülümsəyərdi...

Hər zaman "Vətən”, Torpaq”, "Bayraq” dedi bu dünyaya təşrif gətirən bir oğul. Bu dünyadan bir oğül köçdü – Vətən bayrağına bürünərək Vətən torpağına tapşırılan, ruhu Qarabağ, Qubadlı yurdunda dolaşan bir ŞƏHİD oğul!

Azərbaycanın qeyrətli oğlu Fərrux Həşimov 1 noyabr 2020-ci il tarixində Sumqayıt Şəhidlər Xiyabanında dəfn olunur.

Azərbaycan Ordusunun Hərbi Dəniz Qüvvələrinin "Su Altı Hücum” (SAH) XTQ-nin XTD-nin qrup komadiri, 32 yaşlı kapitan-leytenant Fərrux Mirzəmməd oğlu Həşimov ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Qarabağ” ordeni, həmçinin "Vətən uğrunda”, "Füzulinin azad olunmasına görə”, "Cəbrayılın azad olunmasına görə”, "Qubadlının azad olunmasına görə”, "Xocavəndin azad olunmasına görə” medllatı ilə təltif olunub.

Ruhun şad olsun, Cənnətməkan Şəhidimiz!!!

--------------------------

ƏLƏSGƏRLİ ZAUR MÜBARİZ oğlu

(HDQ, Miçman)

Qısa aayış: ƏLƏSGƏRLİ ZAUR MÜBARİZ oğlu 5 mart 1995-ci ildə Sumqayıt şəhərində anadan olub. 2001-2004-cü illərdə Sumqayıt şəhər 13 saylı, 2004-2012-ci illərdə19 saylı tam orta məktəblərdə təhsil alıb. Zaur Ələsgərli 2013-2014-cü illərdə Azərbaycan Silahlı Qüvvələrinin sıralarında, müddətli həqiqi hərbi xidmətdə Lənkəran şəhərindəki "N” saylı hərbi hissədə olub. O, "tibb qardaşı” kimi xidmət göstərib. Andiçmədən sonra Beyləqan rayonundakı hərbi hissədə xidmətinə davam edib. Vidməti zamanı "Tibb” üzrə 6 aylıq kursu bitirib.

Z.Ələsgərli hərbi xidməti başa vurduqdan sonra, XTQ-də xidmət etmək üçün Xızı rayonunda 6 aylıq kursda iştirak edir. Daha sonra Bakıda aidiyyati quruma "Dəniz Pişiyi” olmaq üçün müraciət edir. Müraciəti müsbət qarşılanaraq, 2016-cı ildə Hərbi Dəniz Qüvvələrində ("dəniz pişiyi”) işləməyə başlayır. 2018-ci ilin mart ayında "Gizir” rütbəsi almaq üçün 3 aylıq kurs keçir.

Beləliklə, Z.Ələsgərli 2018-ci ilin iyun ayından XTQ-nin sıralarında müddətdən artıq həqiqi hərbi xidmət qulluqçusu,"Gizir-Miçman-Dalğıc kəşfiyyatçısı” kimi çalışır.

Zaur Ələsgərli xidməti vəzifəsini şərəflə yerinə yetirdiyinə görə, 20 İyul 2019-cu ildə”Azərbaycan Ordusunun 100 illiyi” Yubiley medalı ilə təltif olunur.

AİLƏ:Əslən Tovuz rayonunun Çeşməli kəndindən olan Ələsgərovlar ailəsi ata, ana və ik qardaşdan ibarət olub. Mübariz Ələsgərov uzun müddət sürücü işləyərək ailəsini halal zəhməti ilə dolandırıb. Vəfa xanım "Konditer-aşbaz” sənətinə sahib olsa da, evdar xanım olmaqla, ailə qayğıları ilə yaşayıb. Evin sonbeşiyi Kənan ailəyə dəstək, valideynlərinə dayaq olmağa çalışıb.

İxtisasca İbtidai sinif müəllimi Vəfa xanımla 2017-ci ilin avqust ayının 20-də ailə həyatı qüran Zaur Ələsgərli özünü dünyanın ən xoşbəxti sanır. Bu evlilikdən onların oğlan övladı dünyaya gəlir və adını "Ayxan” qoyurlar. Gənc ailə ikinci övladın dünyaya gəlişini səbirsizliklə gözləyirdi...

Həyatda təsadüflər çoxdur. Bunlardan biri də, Zaurun anasının və yoldaşının adlarının "Vəfa” olması və ad günlərinin eyni tarixə düşməsi idi. Bu ailədə hər iki xanımın doğum günləri bir yerdə qeyd olunar, o sevinc birgə yaşanardı...

------

Zaur uşaq vaxtlarından şən, oynaq musiqiləri dinləməyi, hətta musiqi sədaları altında idman etməyi sevib. Ən çox da xarici müsiqiləri dinləməyə meyilli olub. Yaşı az olsa da, velosiped təkərlərini söküb-yığmağı bacarıb. 7-ci sinifdə oxuyanda məhlədəki uşaqların xarab olmuş velosipedlərini düzəldər, yığdığı pulu gətirib anasına verərdi. Məktəbi bitirib hərbi xidmətə gedənəcən kafe və restoranlarda ofisiant kimi işləyərək ailəsinə dəstək olardı. O, heç bir işdən, çətinlikdən qorxmazdı. Əməli xeyirxahlıqdan yoğrulan gənc oğlan kiməsə yardım edəndə, köməklik göstərəndə rahatlıq tapardı.

Zaur ailəsinə, övladlarına "çox bağlı” desək, bəlkə də az olar, "düşkün” bir insan idi. Uşaqlarla özü də uşaqlaşardı. Ümumiyyətlə, o qədər su kimi saf, təmiz qəlbli idi ki, qəlbinin gözəlliyi simasında əks olunmuşdu. Evə girdkdə, hər dəfə uşaq kimi gülə-gülə "mən gəldim” deyərdi. Ayxan anasına imkan verməyib, ildırım sürəti ilə "ata gəldi” deyərək qapıya qaçar, atasının boynuna sarılardı. Sonra ata-bala oturub söhbət edər, əylənərdilər. Bu mənzərə kənardan baxıldıqda könül oxşayardı...

Zaur oğlunu çox öpməzdi, baxmayaraq ki, onunla nəfəs alardı, onun sevgisi qəlbinə hakim idi. O, oğlünu bir "ərən” kimi görür, "kişi” kimi böyütməyə çalışırdı. Lakin 2020-ci ilin yayı hər şey fərqli oldu. Yay fəsli girəndən Zaur çox dəyişmişdi. Evə gələn kimi Ayxanı hər dəqiqəbaşı öpərdi. Onun belə dəyişməsi hər kəsə qəribə gəlirdi. O, sanki qarşıda nələr ola, onu nə gözləyə biləcəyini hiss edirmiş...

2020-ci ilin iyulunda baş verən Tovuz hadisələri zamanı düşmənin təxribatı nəticəsində zabitlərimizin həlak olması Zauru çox sarsıdır. Artıq Ayxana olan öpüşlərin sayi daha da artır. Ata nə baş verəcəyini,hara gedəcəyini təxmin edirdi. Sanki balasından doymağa çalışırdı...

---------

27 Sentyabr 2020-ci il tarixində başlanan Vətən müharibəsi zamanı Z.Ələsgərli döyüşlərə qatılaraq, Hadrut, Cəbrayıl, Füzuli, Qubadlı, Xocavənd... uğrunda gedən Haqq savaşında düşmənə qarşı sözünü mərdliklə deyir. Düşmənə amansız zərbələr endirərək, hər qarış torpaq üçün qanından, canlndan keçməyə hazır olur. Hadrut qəsəbəsində düşmənlə əlbəyaxa döyüşdə 9 ermənini məhv edərək silah-sursatlarını sıradan çıxarır. Qubadlı şəhərinin işğaldan azad olunmasında onun da xüsusi xidmətləri olur. Qubadlı şəhəri məhz 24 nəfər xüsusi təyinatlının sayəsində, itki verilmədən alınır.

Füzulinin Qoçəhmədli kəndini işğaldan azad etdikdən sonra, Zaur anasına zəng edir və "kəndinizi işğaldan azad etdik. İnşallah, gəlim, səni gətirəcəm bura, ananın qəbrini ziyaət edərsən” deyir. Ananın sevincdən gözləri yaşarır...

Zaur ən ağır əməliyyatlarda iştirak etməkdən çəkinməyib. Ailəsinə döyüş yolundan məlumat verməyən zabit, bir günatası ilə danışanda vurğulayır ki, "oğullar var, erməninin içində maşın sürür”. Bu cümlə elə onun özünə aid imiş. Erməni dilini səlis bilən Zaur kəşfiyyat zamanı onların arasına düşür. Erməni dilində rahat, təmiz danışaraq, azərbaycanlı olduğunu hiss etdirməyir. Ermənilər də ona "Niva” markalı maşın hədiyyə edirlər. Zaur maşının içərisində "Sumqayıt” sözünü yazaraq, erməni zabitlərini dağdan aşırıb. İgid zabitin şücaətlərini saymaqla qurtarmaz...

Zaur daim öndə olmağa can atırdı. Vətəninin tezliklə yağılardan təmizlənməsini, QƏLƏBƏ zənginin çalınmasını, hər el-obada bayram ab-havasının olmasını istəyirdi.

Hər zaman qayğıkeş, diqqətcil, həssas, kimsənin ondan nigaran olmasını istəməyən gənc zabit, yaxın-doğmalar "Zaur, hardasan?” sualını verəndə, narahatçılıq olmasın deyə, "Gəncədəyəm” cavabını verərdi. Sonuncu dəfə xalası bu sualı verəndə isə, gülə-gülə cavb vermişdi ki, "xala, bilmirsən hardayam?”.

Oktyabrın 30-u Zaurun ailəsiylə son danışığı olur. Heç bir şey olmamış, adi günlərdəki kimi, sakit, təmkinli bir tərzdə hal-əhval tutur, hər kəsi xəbər alır. Sonuncu sözü "özünüzdən muğayat olun” olur...

Oktyabrın 31-də Şuşa-Xocavənd istiqamətində, Şuşa uğrunda qızğın döyüşlər başlayır. Qırmızı Bazar qəsəbəsi uğrunda döyüşlərdə 24 kəşfiyyatçı düşmənlə amansızcasına mübarizə aparır. Döyüş zaman komandirini vururlar. Zaur komandirini xilas etmək üçün özünü irəli atanda yoldaşları "Gözlə, ara sakitləşsin, sonra götürək” desələr də, o, buna etiraz edir. "Birdən qanaxmadan ölər?!” deyərək, döyüş meydanına qayıdır. Komandirini götürüb geri dönən zaman düşmən gülləsinə tuş gəlir. Neçə yerindən yaralansa da, özündə güc toplayb yeriməyə başlayır. Sonuncü güllə ürəyinə dəyərək, həmin an komandiriylə birgə yerə yıxılmasına səbəb olur. Vətənin qeyrətli iki zabiti həmin an həlak olaraq Şəhidlik Zirvəsinə yüksəlirlər...

31.10.2020-ci il. Bu tarix Ələsgərlilərin ömürlük beyinlərinə və qəlbərinə həkk olundu...

Cəmi 25 yaşında adını Vətən qəhrəmanları sırasına yazdırmağı bacaran Azərbaycan Ordusunun məğrur döyüşçüsü mərdliyi, cəsarəti, səmimiliyi, istiqanlılığı, gülərüzü və heç vaxt yaddan çıxmayan şirin söz-söhbəti ilə yaddaşlara həkk olundu. Ölümün gözünə dik baxan Vətən oğlu, Tarixin Qızıl səhifələrini qanıyla yazdı, bütün Azərbaycana ZƏFƏR sevincini yaşatdı, özü layiq olduğu Cənnətin qapılarından içəri məğrurcasına keçdi!

2021-ci ilin yanvar ayında şəhidimiz Zaur Ələsgərlinin bir oğul övladı, 3 yaşlı balaca Ayxana bir qardaş dünyaya gəldi. İkinci oğul övladının dünyaya gələcəyini bilsə də, igidimizə bu sevinci yaşamaq qismət olmadı. O, elə sağlığında oğluna ad seçmişdi. Qəhrəmanımızın istəyi reallaşdırılaraq, yeni doğulan körpəyə "Ayaz” adı qoyulur. Bu gün Şəhidimizin 2 övladı: Ayxan və Ayaz bizlərə əmanətdir.

Hərbidə 17 il qüsursuz xidməti olan, Azərbaycan Hərbi Dəniz Qüvvələrinin miçmanı Zaur Ələsgərli noyabrın 1-i 2020-ci il tarixdə Sumqayıt Şəhidlər Xiyabanında dəfn olunur.

Vətən torpaqlarının yağı düşməndən azad olunmasında, vəzifə borcunu şərəf və ləyaqətlə yerinə yetirən zaman göstərdiyi şücaətə görə, Vətənin qeyrətli, məğrur oğlu, Azərbaycan Ordusunun Hərbi Dəniz Qüvvələrinin XTD-nin 25 yaşlı giziri Zaur Mübariz oğlu Ələsgərli ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Qarabağ” ordeni, həmçinin "Vətən uğrunda”, "Cəbrayılın azad olunmasına görə”, "Xocavəndin azad olunmasına görə”, "Füzulinin azad olunmasına görə”, "Qubadlının azad olunmasına görə” medalları ilə təltif olunub.

Ruhun şad olsun, Cənnətməkan Şəhidimiz!!!

Aygün Hacıyeva,

AJB,AYB,AAB-nin üzvü