S
umqayıt şəhəri Sülh küçəsi, "Bağça şəhər" yaşayış kompleksinin arxasında aparılan tikinti işləri sakinlərin istirahətinə problem yaradır.
Xeberle.com-a müraciət edən sakinlər qeyd edirlər ki, yaşayış kompleksinin inşası zamanı bir sıra hüquq pozuntularına yol verilir. Belə ki, həmin yaşayış kompleksinin tikintisi fasiləsiz həyata keçirilir. Bu işlər gecə saatlarında da davam etdirildiyindən günün 24 saatı normal yaşayış şəraiti pozulur. Xüsusilə gecə vaxtı görülən işlərin səsi sakinləri narahat edir, istirahət və yuxu haqlarını əllərindən alır.
Tikinti işinin axşam 24:00-dan səhər 07:00-a kimi aparılması inzibati xətalar məcəlləsinə görə qanun pozuntusudur.
Sakinlərin sözlərinə görə, məsələylə bağlı DİN-in 102 qaynar xəttinə də şikayət ediblər.
Məlumat üçün bildirək ki, qeyd edilən yaşayış kompleksində aparılan tikinti işləri Azərbaycan Respublikasının Konstitusiyasının 39.1-ci maddəsi ilə müəyyən edilmiş sağlam ətraf mühitdə yaşamaq hüququnu pozur. Belə ki, həmin yaşayış kompleksində aparılan tikinti işləri Azərbaycan Respublikasının Şəhərsalma və Tikinti Məcəlləsinin 57-ci maddəsində nəzərdə tutulmuş tikintiyə dair tələblərə də uyğun aparılmır. Həmin Məcəllənin 57.2.4-cü maddəsinə əsasən, tikinti obyekti səs-küyün və vibrasiya təsirlərinin insan sağlamlığına təhlükə törətməyən həddini keçməməsi tələbinə əməl edilməklə layihələndirilməli və ya tikilməlidir.
Qarşı tərəfin mövqeyini işıqlandırmağa hazırıq.
Elşən Yəhyayev
Xəbərdən istifadə edərkən istinad etmək vacibdir.
