Sumqayıt şəhər İcra Hakimiyyətinin  Başçısı Eldar Əzizov Fövqəladə Hallar Nazirliyinə müraciət ünvanladı

Sumqayıtda köhnə və yeni binalara vurulan bəzəkli üzlüklər ilk baxışdan şəhərə yarışıq verir, hətta işıqlandırma sistemləri ilə göz oxşayır. Amma bu gözoxşayan yaraşığın bir saatın içində yüzlərlə insanın həyatını necə qaralda biləcəyini düşünəndə adam dəhşətə gəlir. Elə 2 il öncə Sumqayıtda Heydər Əliyev prospektində beşmərtəbəli bir binanın yazmasını xatırlamaq kifayət edir. Həmin vaxt itki olmasa da, binaya ciddi ziyan dəymişdi. Məsələ orasındadır ki hazırda bu cür üzlüklə üzlənmiş binalar Sumqayıtda daha çoxdur. Deməli hər an analoji hal Sumqayıtda da təkrarlana bilər. Necə ki, bu günlərdə Xətai rayonu, Zığ şossesində 9 mərtəbəli yaşayış binasında, eləcə də bu gün Azadlıq peospektində 16 mərtəbəli binada çoxsaylı insan tələfatı ilə nəticələnən yanğın baş verdi.

Qeyd edək ki, yanan binanın üzlənməsini həyata keçirən "Global Construction” şirkətinin rəhbəri Miryusif Mahmudov iş üzrə şübhəli şəxs qismində tutulub.

Məlumat üçün bildirək ki, Sumqayıtın Heydər Əliyev prospekti boyunca 10 binanın fasadını "Global Construction” şirkəti üzləyib.

Xeberle.com olaraq Sumqayıtın 3-cü mikrorayon 3/58 binasına üz tutduq. Hansı ki, bu binada da belə materialdan istifadə edərək təmir işləri aparılır. Bu binanın üzlənməsini isə başqa şirkət həyata keçirir. Şirkətin adını öyrənə bilməsək də, məlumat əldə etdik ki, binanın fasadına vurulması nəzərdə tutulan penoplast sabah söküləcək. Bildirildi ki, şirkətdən bu barədə göstəriş verilib.

Əvvəllər "Global Construction şirkəti tərəfindən Sumqayıt şəhərində binaların fasadlarına vurulan penoplastların taleyinin necə olacağı barədə Xeberle.com-un ünvanladığı suala Sumqayıt şəhər Mənzil Kommunal Təsərrüfatı İstehsalat Birliyinin rəisi Abid Əliyev belə cavab verdi:" Bakıda baş vermiş hadisədən dərhal sonra Sumqayıt şəhər İcra hakimiyyətinin Başçısı Eldar Əzizov FHN-ə müraciət ünvanlayıb. Müraciətdə bildirilib ki, bu materallarla üzlənmiş binalara biz məsuliyyət daşıyırıq. Bu binaları belə saxlaya bilərik, yoxsa vurulan üzlükləri sökməliyik? İcra Başçısının bu müraciətinə yəqin ki, sabah rəsmi cavab veriləcək. Əgər rəsmi olaraq bildirsələr ki, bu üzlüklər yanğına davamlı deyil, deməli söküləcək və başqa materialla əvəzlənəcək."

Kamal Almuradlı, Xeberle.com
Fotolar müəllifindir