Sumqayıtın bəzi ərazilərində yerləşən restoranların axşam saatlarında havanı çirkləndirirlər. Nəticədə yayılan kabab iyi və tüstüsü vətəndaşların istirahətinə mane olur.
Belə ki, restorandan havaya buraxılan tüstü ətrafda yaşayan insanların az qala evinə kimi dolur...Dəfələrlə edilən müraciətlərə baxmayaraq, hər hansı tədbir görülmür. Şəhərin bəzi ərazilərində şadlıq saraylarının yanaşı tikilməsi vəziyyəti daha da qəlizləşdirir.
Niyə sözügedən obyektlər bu günə qədər obyektlərinə havatəmizləyən qurğu quraşdırmayıb?
Öncə məlumat üçün qeyd edək ki, prezident İlham Əliyev oktyabrın 9-da Nazirlər Kabinetinin 2018-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunan iclasında havanı çirkləndirən məişət obyektlərinə də ciddi xəbərdarlıq edib. Prezident bildirib ki, kim tələblərə əməl etməyəcəksə, o şadlıq evlərinin və məişət obyektlərinin qapısı bağlanacaq. Dekabr ayında isə ölkə başçısı "Azərbaycan Respublikasının Ekologiya və Təbii Sərvətlər Nazirliyi haqqında Əsasnamənin təsdiq edilməsi barədə” fərmanda dəyişiklik edilməsi haqqında yeni fərman imzaladı.
Əsasnaməyə əsasən, nazirliyə ekoloji tələblərin pozulması ilə əlaqədar müəssisələrdə, qurğu və obyektlərdə təsərrüfat və başqa fəaliyyətlərin məhdudlaşdırılması və ya bu fəaliyyətə xitam verilməsi haqqında vəsatət qaldırmaq hüququ verilib. Dəyişikliyə əsasən, artıq ETSN məhkəməyə müraciət etmədən ekoloji tələblərin pozulması ilə əlaqədar müəssisələrdə, qurğu və obyektlərdə təsərrüfat və başqa fəaliyyətlərin dayandırılması və ya qadağan edilməsi barədə qərar qəbul edə bilər.
Lakin buna baxmayaraq, müvafiq qurğunu quraşdırmayan, havanı çirkləndirməyə davam edən restoranlar hələ də var.
Məsələylə bağlı Ekologiya və Təbii Sərvət Nazirliyi ilə əlaqə saxladıq. Qurumdan Xeberle.com-a bildirilib ki, Dövlət Ekoloji Təhülkəsizlik Xidməti tərəfindən məsələylə bağlı araşdırma aparılacaq.
Bəs ekoloqlar bu barədə nə düşünür?
Ekoloq Ənvər Əliyev açıqlamasında qeyd edib ki, bu cür obyektlərə qarşı sərt cəza tədbirləri görülməlidir:
"Birincisi restoranlar kömürlə işləməlidir. Odunla bişirilməməlidir. İkincisi şəhərin mərkəzində olan restoranlar filtirlərdən istifadə etməlidir. Yaxud da xüsusi kömürlərdən istifadə olunmasi məsləhətdir. Hər halda insan oksigenlə qidalanır. Axşam tərəfi insan pəncərəni açır ki, otaqlara hava girsin. Lakin, çöldə tüstünün olması havanı daha da pisləşdirir. Bunlara qarşı cəza tədbirləri görülməlidir”.
Ümid edirik ki, tezliklə günü-gündən gözəlləşən şəhərimizin bəzi şadlıq sarayları sözügedən problemi köklü şəkildə həllinə çalışacaqlar.
Elşən Yəhyayev
Xəbərdən istifadə edərkən istinad etmək vacibdir.
