Avtobioqrafiya

Əliyeva İradə Tofiq qızı 1956-cı ildə ziyalı ailəsində anadan olub. Atası Tofiq Əliyev uzun müddət - 35 il Sumqayıt şəhər Alüminium zavodunda rəhbər vəzifədə çalışıb. Anası Zərifə Hüseynova Oftomoloji xəstəxananın bünövrəsi qoyulandan burada işləyib. Uzun illər şöbə müdiri vəzifəsini icra edib, ali dərəcəli həkim olub. İradə xanım 1982-ci ildə Azərbaycan Dövlət Tibb Universitetinin Müalicə-profilaktika fakültəsini fərqlənmə diplomu ilə bitirib. Elə həmin ildə Sumqayıt şəhər Oftomoloji xəstəxanada əvvəl həkim, sonra qəbul şöbəsinin müdiri, 1997-ci ildən isə bu xəstəxananın baş həkimi vəzifəsində çalışır. 1993-cü ildən Yeni Azərbaycan Partiyasının üzvü, 1994-cü ildə isə Şəhər partiya konfransında YAP-ın siyasi şurasına üzv seçilib.
Bu günlərdə ölkə Prezidentinin sərəncamı ilə Əliyeva İradə Tofiq qızı "Əməkdar həkim” fəxri adına layiq görülüb. Ailəlidir, 1 oğul övladı var.

- Gəlin lap əvvəldən başlayaq. Tibb sahəsinə istək demək olarmı ki, ananızdan gəlib?

Mən anadan olan gün anam və atam Bakıda İslam Səfərlinin Göz həkimi tamaşasına baxırmışlar. Və belə qərara gəliblər ki, qızımız olsa, adını tamaşadakı rola uyğun olaraq İradə qoyarıq özü də göz həkim olar. Və həyat elə gətirdi ki, onların arzusu çin oldu.
- Bəs özünüz bu sahəyə istəyiniz var idimi?
Açıq etiraf edim ki, mən ingilis dili müəlliməsi olmaq istəyirdim. Fikirlərim qarışıq idi. Çünki gah ingilis dili müəllimi, gah da həkim olmaq istəyi məni çaş-baş salmışdı. Həmin vaxt anam Bakıda görkəmli həkim oftomoloq Zərifə Əliyevanın yanında ixtisasartırma kursu keçirdi. Orada anam Zərifə xanımla söhbətində bildirir ki, mən çox istərdim ki, qızım göz həkimi olsun, amma qızım tərəddüd edir. Zərifə xanım da anama demişdi ki, sən qızını gətir, mən onunla danışım. Bizim ailəvi yaxın münasibətimiz var idi. Bir müddət sonra anam məni Zərifə xanımın yanına apardı. Mən həmin vaxt onuncu sinifdə oxuyurdum. Zərifə xanım elə ilk görüşdən məndə müsbət fikir formalaşdırdı. Mənlə ünsiyyəti zamanı onun sadəliyi, mehribanlığı, səmimiyyəti məni valeh etdi. Yadıma gəlir, həmin gün hava çox soyuq, qarlı, çovğunlu idi. Zərifə xanım xidməti maşını ilə bizi Avtovağzala qədər gətirdi. Bu söhbət mənim həyatımda həlledici rol oynadı və mən fikrimi tam qətiləşdirdim. Anam məni yolumdan döndərə bilmədi amma Zərifə xanım bunu bacardı.

- Və siz sənədlərinizi tibb Universitetinə verdiniz?
Bəli. Amma o vaxta qədər mən ingilis dili üzrə hazırlaşdığım üçün birinci il kəsildim. Müsabiqəyə düşdüm. Daha sonra hazırlaşdım və növbəti il məqsədimə nail oldum.

- Tələbəlik illəriniz necə keçib?

Müəllimlərim çox ciddi idilər. Nədəsə güzəştə getmirdilər. Amma açığı deyim, mən 4-ə layiq bildiyim bir neçə fənn olub ki müəllimlərim sırf davranışıma, tərbiyəmə görə mənə 5 qiymət veriblər. Ona görə də ali məktəbi fərqlənmə ilə bitirdim. Təyinatımı birbaşa bura - oftolmoloji xəstəxanaya aldım. O vaxtı buranın baş həkimi çox böyük hörmətə və nüfuza malik olan Məhərrəm Novruzov idi. Ondan da çox şey öyrəndim.

- İradə xanım, artıq neçə ildir baş həkimsiniz. Təxminən bu illər ərzində nə qədər insan bu tibb ocağına müraciət edib, xəstələrin bura münasibəti necədi?

Hazırda xəstələrimiz bizdən və xəstəxanamızdan çox razıdırlar. Hətta elələri var ki, evə yazılanda burdakı isti münasibətdən heç evə getmək istəmirlər. İl ərzində bizə qəbul üçün təxminən 2000-ə yaxın xəstə müraciət edir, amma ambulator müayinə üçün isə 2000-dən çox insan müraciəti qeydə alınır. Bu yaxınlarda müasir standartlara cavab verən katarakta əməliyyatı üçün yeni aparat alınıb. Səhiyyə nazirliyi tərəfindən şəxsən cənab nazirimiz Oqtay Şirəliyev tərəfindən İstanbuldan bu aparatla işləyə bilən həkim dəvət olunacaq.
- Ötən illərə nisbətən müraciətlər azalıb, ya çoxalıb?

Çoxalıb. Ən çox müraciət isə el arasında "mirvari suyu” kimi tanınan katarakta problemi ilə əlaqədardır. Daha sonra qlaukoma (qara su) da yayılan problemlər arasındadır. Uşaqlarda isə çəpgözlük və sair yayılıb.

- İctimai həyatınızda hansı yadda qalan günləri xüsisi xatırlayırsınız?
Belə günlərdən çox olub, amma 1994-cü ildə isə Şəhər partiya konfransında YAP-ın siyasi şurasına üzv seçildiyim günü qeyd etmək istərdim. Həmin konfrans indi də mənim xatirimdədir. Dəvətlilər arasında bizim çox görkəmli mərhum akademikimiz Fərəməz Maqsudov var idi. O zala daxil olanda anamı gördü və bizə yaxınlaşdı. Hamıya bizi təqdim edərək bildirdi ki, Mən Zərifə xanımın qrup yoldaşıyam və Zərifə xanımın babası ulu öndərimiz Heydər Əliyevin müəllimi olub. Biləndə ki, mən Zərifə xanımın qızıyam söylədi ki, bu qız mütləq siyasi şuranın üzvü olmalıdır. Çünki bu insanlar ailəliklə ziyalıdırlar, vətənə, dövlətə, iqtidara sadiq insanlardılar.

- İradə xanım, bu günlərdə ölkə başçısı tərəfindən mükafatlandırıldınız. Bu barədə nə deyə bilərsiniz?

İşlədiyim müddətdə mən Sumqayıt şəhər İcra Hakimiyyəti tərəfindən, eləcə də Səhiyyə şöbəsi tərəfindən müxtəlif fəxri fərman və diplomlarla təltif olunmuşam. Fəaliyyət göstərdiyim bu tibb müəssisəsi haqqında bizim nazirlikdə çox müsbət fikir var. Bu da əbəs yerə deyil. Burada müalicə alan və əməliyyat olunan xəstələr tərəfindən dəfələrlə təşəkkür məktubu alınıb. Hətta xarici ölkə vətəndaşları belə yazılı olaraq öz minnətdarlığını bildiriblər. Təbii ki, bütün bunlar həm nazirlik və xüsusi ilə də cənab prezidentimiz tərəfindən yüksək qiymətləndirildi və mənə bu fəxri adı verdilər. Bu ad məni çox sevindirdi və daha da məsuliyyətli etdi.

- Bildirdiniz ki, xarici vətəndaşlardan təşəkkür məktubu alırsınız. Əsasən hansı ölkələrdən müraciət olunur?

Əsasən Ukrayna və Gürcüstan vətəndaşları müraciət edir. Bununla yanaşı, Rusiya və Moldovadan da müraciətlər var.

- Bir az da Sumqayıtla bağlı danışaq. Son yeniliklər sizi qane edirmi?

Sumqayıt hamımızın doğma şəhəridir. Buranın hər yeri mənimçün əzizdir. Təbii ki, şəhərdə baş verən yeniliklər hamı kimi, məni də çox sevindirir. Şəhərimizin başçısı cənab Zakir Fərəcov Sumqayıta gəldikdən bir gün sonra artıq bizim müəssisəyə gəlmişdi. Xəstəxananın binası ilə tanış olduqdan sonra müsbət qiymətləndirdi. Biləndə ki, buradakı işlər öz daxili hesabımıza olub soruşdu ki, mən sizə nə köməklik edim, nəyə ehtiyacınız var?! Mən də xahiş etdim ki, bura asvalt çəkilsə, yaxşı olardı. Mənim xahişimi nəzərə alaraq cənab başçı göstəriş verdi və problem aradan qalxdı. Əlavə olaraq, xəstəxanamızın dam örtüyü də yeniləndi. Ümumilikdə şəhərimizdə isə abadlıq işləri sürətlə və zövqlə gedir. Eyni vaxtda bu qədər işlərin səviyyəli şəkildə görülməsi bizi çox sevindirir. Sumqayıtın demək olar ki, hər yerində abadlıq işləri aparılır. Mənim özüm həmişə arzulayırdım ki, Sumqayıtın girişi gözəl olsun. Çünki hara gedirsən get, ilk təəssürat o şəhərin girişindən başlayır. Xəyallarımda formalaşdırdığım girişi bu gün Zakir müəllim həyata keçirir. Bu işdə ona uğurlar arzu edirəm.

- Zakir müəllim etdiyiniz xahişləri yerinə yetirdi. Maraqlıdır, indi yenə belə bir imkan olsa, nə istəyətrdiniz?

Çox istəyərdim ki, xəstəxanamızın binasının fasadının yenilənməsinə yardımçı olsun. Binanın içərisi yüksək səviyyədədir. Amma çöl görünüşü bir o qədər də ürəkaçan deyil. Ümidvaram ki, bu problemimiz də yaxın vaxtlarda həll olunacaq.

Sonda bir həkim kimi Sumqayıt və Azərbaycan tibbinin daha da inkişaf etməsini, yeni kadrların yetişməsini arzu edirəm! Şəhərimizə əmin-amanlıq, Sumqayıt sakinlərinə, şəhər rəhbərliyinə, şəhərimizdə əməyi keçən bütün şəxslərə can sağlığı və uğurlar diləyirəm!

Söhbətləşdi Kamal Almuradlı

Xeberle.com