26 İyun – Azərbaycan Respublikasının Silahlı Qüvvələri günü münasibətilə Sumqayıt şəhər  İcra Hakimiyyətinin təşəbbüsü ilə Hacı Zeynalabdin qəsəbəsindəki   "N” saylı hərbi hissədə  bayram konserti və  əsgər valideyinləri üçün "açıq qapı " günü  keçirilib.

Əvvəlcə hərbi hissənin həyətində ümumilli lider Heydər Əliyevin  büstü ziyarət olunub. Sumqayıt şəhər İcra Hakimiyyətinin başçısı Zakir Fərəcov əsgərlərimizin xidməti, məişət şəraiti ilə maraqlanmış, əsgərlərlə söhbətlər aparıb. Azərbaycan Respublikası Silahlı Qüvvələri günü münasibətilə zabit, gizir və əsgərləri  təbrik edib və xalqımıza tezliklə qələbə sevinci arzulayıb.

Ölkəmizdə ordu quruculuğu tarixinə nəzər salınaraq bildirilib ki, bu il yaradılmasının 98-ci ildönümünü qeyd edən silahlı qüvvələrimizin Azərbaycan tarixində özünəməxsus yeri var.

Çıxışlarda qeyd edilib ki, son dövrlər cəbhə bölgəsində baş verən hadisələr, Ermənistan ordusunun təxribat xarakterli hücumları zamanı düşmənə göstərilən müqavimət, verilən qəti və kəskin cavablar Azərbaycanın güclü və qüdrətli orduya malik olmasını sözdə deyil, əməldə sübut etdi. Düşmən tərəfin bu namərdliyinə verilən layiqli cavab Azərbaycan Ordusunun yüksək əhval-ruhiyyədə və qələbə əzmində, həmçinin xalqla hakimiyyətin, xalqla ordunun bir yerdə olduğunu, eyni amal uğrunda əl-ələ verərək sıx birləşdiyini, ən əsası isə milli ruhun oyaq olmasının bariz nümunəsini ortaya qoydu.

Hərbi hissənin xidmətdə fərqlənən qulluqçuları  təltif olunduqdan sonra  meydanda təşkil edilən sərgiyə baxış ke,irilib. Sərgidə nümayiş etdirilən müxtəlif növ təlim döyüş texnikası, əsgər yeməkləri, geyimləri barədə qonaqlara  ətraflı məlumat verilib. Valideynlər  hərbi hissədə əsgərlərə yaradılan şəraitlə tanış olublar.

Daha sonra tədbir  incəsənət ustalarının iştirakı ilə təşkil olunmuş konsert proqramı ilə davam etdirilib.