Son bir neçə ayda Sumqayıt şəhərində başlanılan genişmiqyaslı abadlıq-qurucluq işləri uğurla davam etdirilir. Şəhərdə aparılan abadlıq-quruculuq işlərinin tərkib hissəsi kimi yol infrastrukturunun yenilənməsinə xüsusi diqqət yetirilir.
Sumqayıt şəhər İcra Hakimiyyətinin Başçısı Zakir Fərəcov şəhər ictimaiyyətinin iştirakı ilə keçirilən iclasların birində qısa müddət ərzində şəhərin giriş yollarının təmir olunacağını və yeni görkəm alacağını qeyd etmişdi.
Novxanı-Sumqayıt istiqamətində avtomobil yolunun ətrafında qanunsuz hasarlamaların aparılması, eləcə də illərdən bəri şəhərin əsas giriş yollarından biri olan Sahil küçəsinin baxımsız olması burada əsaslı işlərin görülməsi zərurətini yaratmışdı. Son bir neçə ayda şəhərdə həyata keçirilən önəmli layihələrdən biri də məhz Sumqayıtın üçüncü girişi hesab olunan Sahil küçəsinin yenidən qurulması ilə bağlı oldu.
Belə ki, 7,5 kilometr uzunluğu olan Sahil küçəsinin genişləndirilməsi və abadlaşdırılması prosesi hazırda uğurla davam etdirilir. Yol boyu qanunsuz çəkilmiş hasarlar sökülərək yolun genişləndirilməsi işlərinə başlanılıb. Yolun qədim yaşayış məskənlərindən sayılan Corat qəsəbəsindən keçən hissəsində sakinlərin istirahəti məqsədilə də işlər həyata keçirilib. Yolun kənarlarında parklar salınıb, yaşıllaşdırma işləri aparılıb və hazırda da bu istiqamətdə işlər davam etdirilir.
Xəbərdən istifadə edərkən istinad etmək vacibdir.
