50 ildən artıq əhalinin sağlamlığı keşiyində dayanaraq, doğma xalqına sədaqətlə xidmət etmiş Hacı Cəfər həklimlə mən uzun illərdir ki tanışam. O, özünün mahir cərrah olması, xəstələrə səmimi, qayğıkeş münasibəti, təmənnasızlığı ilə həmişə seçilib. Hələ Sovet dövründən Sumqayıtda rüşvət almayan həkimlərdən söz düşəndə ilk növbədə Cəfər həkimin adı çəkilirdi. Mənim qardaşımı da, övladlarımdan birini də ən çətin, ağır vəziyyətdən məhz o xilas edib. Əməliyyatdan sonra da daim xəstələrimizə diqqətlə, qayğı ilə nəzarət edib. Xəstəmiz tam sağalandan sonra bir dəfə mən "səhv" edib, Cəfər həkimə minnətdarlıq əlaməti olaraq bir qutu şokolad alaraq palataya gələndə, məqsədimi bilən xəstələr bir ağızdan üstümə düşdülər ki, "nəbadə! Özünüzü peşman etmək istəmirsinizsə, belə şey etməyin. Cəfər həkim nə pay, nə də pul-para alanlardan deyil!".

Sonrakı illərdə də nə vaxt ailəmizdə, qohum-qardaş arasında xəstəliklə üzləşən olanda həmişə üz tutub, yanına qaçdığımız, əlac umduğumuz da ilk növbədə Cəfər həkim olub. Çünki o, həqiqətən loğmandır, öz müqəddəs peşəsini sevir və çox yaxşı bilir. Həmişə daha çox neqativ təsiri olan kimyəvi dərmanlara yox, xalq təbabətinə üstünlük verir. On minllərlə xəstəni çətin ayaqda operasiya edərək, onlara şəfa vermiş Cəfər həkimin oğlu çox gənc yaşında dünyadan köçəndə isə o, oğlunu müalicə edən həkimə xətrə toxunacaq bir söz belə demək istəyində olmamışdı. Çünki oğlunun xəstəliyindən, əlacsız olduğundan xəbərsiz deyildi. Sonuncu xəstəsinin də çıxılmaz vəziyyətdə olduğunu, əlacsız dərdə düşdüyünü də bilirdi. Ancaq çalışmışdı ki, gənc ananın həyatı üçün sona qədər mübarizə aparsın. Düşünmüşdü ki, bəlkə nəsə bir əlac eləyə bildi. Əfsuslsr ki, xəstənin düşdüyü son dərəcə ağır vəziyyəti onu xilas etməyə imkan vermədi. Eşitdiyimə görə, Cəfər həkim xəstəyə bilavasitə özü nəzarət edərək, iki sutka evinə də gedə bilməmişdi. Səhiyyə Nazirliyinin Mətbuat xidmətinin əməkdaşı Səfayə Əhmədova da Cəfər həkim haqqında danışarkən olduqca obyektiv fikir söyləyərək, bildirib ki, "həkim Cəfər Quliyev professional cərrahdır, o, "Şöhrət” ordeni almış həkimdir. Bir mütəxəssis kimi Cəfər Quliyevin işinə söz ola bilməz. Onun 81 yaşında hələ də işləməsi kadr çatışmazlığından yox, professionallığından irəli gəlir”.

S.Əhmədova sağ olsun ki, etiraf etməkdən çəkinməyib ki, "Cəfər həkim tanınmış cərrahdır, uzun illər Tibb Universitetində dərs deyib, təcrübi baxımdan professionaldır. Onu işini bilməməkdə, yaxud düzgün icra etməməkdə ittiham əsassızdır”. Beləliklə də aydın olur ki, gənc ananın ölümündə məşhur həkimi yox, amansız xəstəliyi ittiham etmək düzgün olardı. Əsassız ittihamlarla xalqımızın loğman həkiminə, əsl Allah adamı olan Hacı Cəfər həkimə mənəvi zərbə vurmaq lazım deyil. Onsuz da, özünün dediyi kimi, şəfa verdiyi xəstəsi ilə özü də şəfa tapan, mindən bir ölən xəstəsi ilə özü də "ölən" həkimin çəkdiyi mənəvi əzab, keçirdiyi sarsıntı ona kifayətdir.

Hacı Cəfər həkimi yaxşı tanımayanlardan isə xahiş edirəm ki, aşağıdaklı link vasitəsilə Cəfər həkimlə daha yaxından tanış olsunlar, onun öz müqəddəs sənətinə nə dərəcədə sədaqətli olduğunu görsünlər.

Onda tam aydın olar ki, Cəfər həkim xəstəni "öldürən" yox, "dirildən" həkimlərdəndir, əsl loğmandır.