Qraffiti – küçə rəssamlığı ilə bağlı bir neçə fikrimi sizlərlə bölüşmək istərdim. Bununla bağlı ilk növbədə Gürcüstandan bəzi məqamları paylaşacam. Bu yaxınlarda qonşu ölkədə oldum. Qraffiti rəssamları Tiflisin bütün ara küçələrini, əsasən böyük otellərin yanında bütün təmirsiz küçə və xiyabanları öz əsərləri ilə bəzəyərək şəhərə rəngbərəng ahəng qatıblar. Tiflisdən sonra bu "divar əsərləri”ni digər böyük şəhər Rustavinin küçələrində görmək olar. Rustavidə hətta bizə daha çox tanış olan 9 mərtəbəli mikrorayon binalarının fasadları da küçə rəssamları tərəfindən "işlənilib”.

 

 

 

Növbəti şəhər kimi Avropa Birliyinə daxil olan Litva Respublikasının paytaxtı Vilnüsü göstərmək olar. Şəhər sakinləri qonaqlara, turistlərə hansı küçə və xiyabanda daha gözəl qraffitilərin olması, onları çəkən qraffiti ustaları haqda məlumat verirlər və ya aparıb yerindəcə göstərirlər. Çəkilən fotolardan da görünür ki, şəhərə gələn turistlər qraffitiləri telefon və ya fotoaparatları ilə çəkirlər.

 

 

 

 

 

 

İndi isə doğma Sumqayıtımızdan söhbət açaq. Sumqayıtda da istedadlı küçə rəssamları var. Qraffiti ustaları hərdən ara küçələrdə, qarajların üzərində və ya hər hansısa gözdən iraq dalanlarda paslanmaqda olan avtomobillərin üzərində öz əsərlərini yaradırlar. Tiflis, Rustavi və Vilnüsdə olduğu kimi, bizim şəhərin küçə rəssamlarına da icazə verilsə, düşünürəm ki, əl işləri, heç də xarici ölkələrin rəssamlarınınkından geri qalmaz. Əksinə, bizimkilər daha gözəl əsərlər araya-ərsəyə gətirə bilərlər. Nəzərə almaq lazımdır Sumqayıtda çəkilən bütün graffitilər gecə saatlarında hər kəsin yatdığı bir vaxtda baş verir ki, bunun da səbəbi vandalizmə görə həbs olunma qorxularıdır.

 

 

Mənə görə, boz, quru binalarıın üzərində, gözdən-könüldən uzaq ara məhəllə və küçələrdə qraffitilərə icazə verilsəydi, şəhərimizə gələcək qonaqlar üçün daha bir maraqlı görüntülər olardı.