Azərbaycanda əhalinin ən çox narazı qaldığı sahələrdən biri, bəlkə də birincisi nəqliyyat sahəsidir. Buna bariz "nümunə”lərdən biri də Sumqayıt şəhər Avtovağzalıdır. Dünyada olan bütün şəhərlərin hamısına şəhərin girişindən daxil olanda gözə çarpan ilk binalardan biri avtovağzal binası olur. Hər bir şəhərin giriş qapısı sayılan və bir növ, vizit kartı olan avtovağzalın vəziyyətinə uyğun olaraq, şəhərin hansı səviyyədə olması haqda mühakimə yürütmək olur. Sumqayıt ölkənin 3-cü böyük şəhəri olsa da, avtovağzalı ucqar rayon avtovağzallarından elə də fərqlənmir.

 

Avtovağzalın əsas binası alkoponla üzlənsə də, interyeri və avtobuslar dayanan həyət hissəsi Afrikadakı vəziyyəti, avtobus dayanacaqlarında qoyulan trafaretlər sovet dövrünün qalıqlarını xatırladır. Avtovağzalın həyətinin bərbad vəziyyətdə olan yol örtüyü isə kənd yollarına oxşayır. Buranın bir tərəfini isə qamışlıq basıb. Uzun müddətdir hasara alınan ərazidə tikilməli olan obyektin tikintisi də təxirə salınıb...

 

Sumqayıtın avtovağzalında sözün əsl mənasında biabırçı vəziyyət yaşanır.

Bir sözlə Sumqayıt Avtovağzalında vəziyyət heç də ürəkaçan deyil. Diqqəti çəkən bir məqam da Sumqayıt Avtovağzalında bu tipli yerlərdə adi olan Allahın "Xoş Gəlmisiniz”"Yaxşı Yol " yazılan löhvələrinə də rast gəlinməməsidir. Üstəlik buranın nə normal bir gözləmə məntəqəsi, nə də səliqəli bufeti yoxdur. Yaxınlıqdakı iaşə obyektlərində bişirilən peraşki və qutabın insan sağlamlığı üçün nə dərəcədə zərərli olmasını isə güman etmək çətin deyil. Bu səbəbdən Avtovağzaldakı biabırçı duruma digər mənada "Yaxşı Yol! " deməyin vaxtı çoxdan çatıb.

Sumqayıt şəhərində aparılan abadlıq-quruculuq işlərini, şəhərdə kompleks estetik-bərpa tədbirlərinin aparılmasını nəzərə alsaq, avtovağzalın bugünkü durumu həyata keçirilən böyük iş və layihələrə kölgə sala bilər.

Ümidvarıq ki, qısa müddət ərzində həll onunan digər məsələlər kimi, şəhər rəhbərliyinin müdaxiləsi nəticəsində bu problem də dərhal həllini tapacaq və Sumqayıtın adına layiq avtovağzalı olacaq.