Sumqayıt Təmizlik Departamenti 27500 manat cərimə olunub

Sumqayıtda Məişət Tullantıları Poliqonunda zibilin yandırılması nəticəsində son 1-2 ayda ciddi ekoloji problem baş qaldırıb. Artıq Ekologiya və Təbii Sərvətlər Nazirliyi də məsələyə münasibət bildirib. Nazirliyin Ətraf mühitin mühafizəsi departamentinin sektor müdiri Raquf Mirzəyev Xeberle.com-a bunları söyləyib :

- Məişət Tullantıları Poliqonu Sumqayıt şəhər Mənzil Kommunal Təsərrüfat İstehsalat Birliyinin nəzdində olan "Sumqayıt şəhər Təmizlik Departamenti” Məhdud Məsuliyyətli Cəmiyyətin (MMC) balansındadır. İstehsalat və məişət tullantıları haqqında qanunda da belə tələb olunur ki, məişət tullantılarının yığılması, daşınması və zərərsizləşdirilməsi bilavasitə yerli icra hakimiyyətlərinin müvafiq strukturları tərəfindən həyata keçirilir. Həmin poliqon 80-ci illərdə sırf Sumqayıt şəhəri üçün nəzərdə tutulub. Bu ərazi məişət tullantılarının yığılması və zərərsizləşdirilməsi üçün nəzərdə tutulan poliqondur. Hazırda həmin MMC-nin istifadəsində olan torpaq sahəsi 110 hektardır. Orda köhnə tullantılarda var, yeni tullantılar da qəbul olunur. Amma çox təəssüflər olsun ki, görülən tədbirlərə baxmayaraq, bu poliqonda qanunvericiliyin tələbləri yerinə yetirilmir. Belə ki, bu poliqon tam hasarlanmayıb, giriş-çıxışına şlaqbaum qoyulmayıb, əraziyə kənar şəxslər girir və nəticədə əraziyə tam nəzarət olunmur. Bu səbəbdən də sözsüz ki, məişət tullantıllarının yandırılması halları baş verir. Yanmaya 2 faktor ola bilər. Biri özü-özünə alışma, digər tərəfdən isə ayrı-ayrı vətəndaşlar tərəfindən. Kimlərsə əraziyə daxil olur, ora mal-heyvan girir, qarşısı alınmır. Yəni poliqon kənar şəxslərin müdaxiləsi səbəbindən də yana bilər. Qanunvericilikdə göstərilib ki, tullantı qəbul olunanda buldozerlərlə tullantıların üstü torpaqla örtürməlidir ki, öz-özünə alışması üçün oksigen sahəsinin yaranmasının qarşısı alınsın. Çox təəssüflər olsun ki, indiyədək poliqona tam nəzarət olunmur. Orada öz-özünə alışma və digər faktorlar səbəbindən məişət tullantıları yanır. İndiyədək - son 3 ildə Sumqayıt şəhər Təmizlik Departamenti bu məsələlərlə bağlı İnzibati Xətalar Məcəlləsinin 276.1 maddəsinə əsasən inzibati qaydada 27500 manat cərimə olunub. Eyni zamanda onlara məcburi qaydada göstərişlər verilib, aidiyyəti qurumlar qarşısında məsələlər qaldırılıb. Lakin təəssüflər olsun ki, indiyə kimi bu aktual məsələlər öz həllini tapmayıb. Nə poliqonun ərazisi hasarlanmayıb, nə giriş-çıxışa şlaqbaumlar qoyulmayıb, nə də kənar şəxslərin əraziyə daxil olmasına nəzarət olunmur. Ona görə də gecə vaxtlarında ,ayrı-ayrı günlərdə yanma istisna olunmur. Monitorinqlərimizi davam etdiririk. Hazırda yanma faktoru yoxdur. Poliqon üçün yer ayrılan vaxtlar Sumqayıt sənaye zonası hesab olunurdu. Son vaxtlar yaşayış massivi genişlənib. Ona görə də iy-qoxunun da olması istisna olunmur. Sözsüz ki, bu kəskin qoxu Sumqayıt sakinlərini narahat edir. Təcili bu problemə əlac tapılmalıdır. Sözsüz ki, cərimə olunma da məsələnin həlli deyil. Bu işə aidiyyəti qurumlar tərəfindən müəyyən təkliflər verilməlidir, layihələr hazırlanmalıdır. Bu sahədə məqsədyönlü işlər aparılmalıdır. Bizə müraciət olunarsa, öz təkliflərimizi verə bilərik. Sumqayıtda son vaxtlar yaxşı layihələr həyata keçirilir. Yolların tikintisi, çirkab suların dənizə axıdılmasının qarşısının alınması istiqamətində böyük işlər görülür. Yəqin ki, gələcəkdə Sumqayıt şəhərinin aidiyyəti qurumları tərəfindən bu sahədə də müsbət dəyişikliklər olacaq.

Bu yaxınlarda Nazirliyin "qaynar xətti”nə olan şikayətə gəldikdə isə Raquf Mirzəyev bunları bildirdi: Şikayət olunanda biz ora nümayəndəmizi göndərdik. Orada bir nəfəri yanğın törətdiyinə görə saxlamışdılar. Həmin şəxslə bağlı akt tərtib olundu.Şəxsiyyəti müəyyənləşdirə bilmədiyimizdən protokol tərtib olunmadı.

Faktla bağlı biz Sumqayıt şəhər Polis İdarəsinə rəsmi qaydada müraciət etmişik. Şəxsiyyət müəyyənləşəndən sonra həmin vətəndaş barəsində qanunvericiliyə uyğun şəkildə tədbir görüləcək. Həmçinin Sumqayıt şəhər Təmizlik departamentinə icrası məcburi göstəriş verilib ki, belə halların qarşısı alınsın. Söhbət ondan gedir ki, bir daha təkrar edirəm, bu poliqon tam hasarlanmalıdır. Ora şlaqbaum qoyulmalıdır. Tullantı ki qəbul olundu, üstü buldozer vasitəsiylə torpaqla örtülməli, düzlənməlidir. Öz-özünə alışmanın qarşısı alınmalıdır, kənar adamlar ora daxil olmamalıdır.