Sumqayıtda maraqlı aksiyaya start verilib.
Belə ki, iyulun 15-də, Milli Mətbuat günü ərəfəsində kimyaçılarla Sumqayıt şəhərinin bir qrup mətbuat nümayəndələrinin görüşü zamanı Xeberle.com saytı maraqlı ekoloji təşəbbüs irəli sürüb.  Şəhərimizin təmizliyini qorumaq məqsədilə sakinlərin sıx toplaşdığı ərazilərdə, həmçinin "Kapital Bank Arena"da plastik su qablarının toplanması və sonradan təkrar emala verilməsi üçün üzərində ekoloji-maarifləndirici yazılar olan su qabı formasında tullantı qablarının hazırlanması təklif edilib.
Kimyaçılar isə bu qabların hazırlanmasını öz üzərlərinə götürüblər.
Maraqlı dizayn ilə hazırlanan və şəhərimizi tullantı plastik qablardan təmiz edəcək bu maraqlı layihənin ilk modelləri isə Sumqayıt Futbol Klubunun stadionunda quraşdırılıb.