Son illər dünya bazarında neftin ucuzlaşması əsas neft ixracatçısı olan Azərbaycan üçün arzuolunmaz nəticələr gətirdi. Belə ki, 2015-ci ilin fevral və dekabr aylarında ölkədə iki dəfə devalvasiya yaşandı. Nəticə etibariylə manatın dəyərdən düşməsi minlərlə iş yerinin bağlanmasına səbəb oldu və əhalinin dolanışıq səviyyəsinin pisləşməsinə rəvac verdi. Təbii ki, belə məqamlarda ölkə vətəndaşlarının ümid yeri həm də işsizlik müavinəti və ünvanlı sosial yardımlara bağlanır. Ancaq adıçəkilən müavinətləri almaq biz vətəndaşlar üçün bir müşkülə çevrilir, bəzən isə əsəb-sinir sistemləri pozur, dava-dalaş səviyyəsinə gətirib çıxarır. Hətta insanlar aylarla get-gələ salınır: nə işsizlik müavinəti  təyin olunur, nə də iş təklif olunur.

 

Sumqayıt şəhər sakini Vüsal Hacıyev Xeberle.com-a müraciətində bildirir ki, bu yardımdan faydalanmaq istəsə də, düz 10 ay yollarda qalıb. Hətta bu ilin fevral, mart aylarında Sumqayıt Məşğulluq İdarəsinin önündə səhər saat 06:00-dan tutulan növbələri (iş saat 09:00-da başlayır) 1990-cı illərin çörək növbəsindən betər mənzərəni xatırladırdı: "Nəhayət, bu ilin iyun ayının 22-də 82.50 manat işsizlik müavinətini aldım. Növbəti ayda isə müavinət 6 gün gecikdi (iyulun 28-i aldım). Avqust ayı isə əməlli-başlı problemə çevrilib. Belə ki, avqust ayı arxada qalsa da, hələ müavinətdən xəbər yoxdur. ''Bu gün-sabah'' deyib bizi aldadırlar. Maraqlıdır, bu məmurlar niyə vətəndaşlara belə münasibət göstərməlidirlər?! Ölkə başçısı cənab İlham Əliyev hər dəfə çıxışlarında əhalinin sosial vəziyyətinin daim stabil saxlanması üçün tövsiyə və tapşırıqlarını verir. İndiki vəziyyətdə isə Əmək və Əhalinin Sosial Müdafiəsi Nazirliyi bu tapşırığa məhəl qoymaq istəmir. Avqust ayı üçün təyin olunan işsizlik müavinətinin indiyə kimi bank hesabına köçürülməməsi vətəndaşları dövlətə qarşı ciddi şəkildə narazı salır. Təsəvvür edin, əhalisinin sayına görə ölkənin üçüncü şəhəri sayılan Sumqayıtda bu cür narazılığın yaranması vətəndaş hökümət nümayəndələri arasında nə qədər də uçurum yaradır. Yeni icra başçısı Zakir Fərəcovun təyinatından sonra "gənclik şəhəri” böyük tikinti meydanını xatırladır. Müasir standartlara uyğun Sumqayıt bulvarı salınır, Heydər Əliyev parkı yenidən qurulur. Hər yerdə dəyişiklik və inkişaf... Ancaq ƏƏSMN bu uğurlara kölgə salır. Yoxsa nazirlik bu qədər insanı nə üçün narazı salmalıdır?! Digər məqam ölkə başçısı İlham Əliyevin Sumqayıta gözlənilən səfəriylə bağlıdır. Səfər zamanı bir xeyli yeni obyektlərin açılışı gözlənilir. Belə vəziyyətdə aidiyyəti qurumların etinazıslığı utancvericidir. Yoxsa ayrılan pulu dövriyyə buraxıblar, xəbərimiz yoxdur?! Əgər belədirsə, prokurorluq bu işi araşdırmalı, haqqı tapdalanan işsizlərin haqqı bərpa olunmalıdır. 6 ay işsizlik müavinəti verirlər, sonra da deyirlər 1 ayın pulunu da bizə verin. Belə dözülməz vəziyyət olar?!"

 

Xeberle.com portalı məsələ ilə bağlı Sumqayıt şəhər Əmək və Məşğulluq İdarəsinin rəisi İlham Hüseynovla əlaqə saxlayıb münasibət öyrənməyə çalışdıq. Mobil nömrəsini əldə edə bilmədik. İş telefonuna zəng edib suallarımızın olduğunu bildirəndə bir xanım işçisi söylədi ki yanında adamlar var, sonra özü sizinlə əlaqə saxlayar. Təəssüf ki, bizə təkrar zəng olunmadı. Ən maraqlısı isə budur ki, İlham müəllim facebook sosial şəbəkəsində dostluq siyahımızdadır. Fürsətdən istifadə edərək ona bu problemlə bağlı konkret sual ünvanladıq. O isə suala cavab vermək əvəzinə bizi dostluq siyahısından çıxardı. Gülməli və qəribədir, deyilmi. İlham müəllim suala cavab vermək, ictimaiyyəti, müavinət almaq istəyən sakinləri maraqlandıran suallara cavab vermək əvəzinə susmağı, yayınmağı üstün tutdu. Yəqin onun da özünün səbəbləri var.