Bu isə vətəndaşların narazılığına səbəb olur. Belə bir halla qarşılaşanlardan biri də şəhər sakini Hürü Hacızadədir. Vaqif Əzizov da analoji hadisə ilə qarşılaşıb. Deyir ki, veriləsi sualım çoxdur, amma cavab verən yoxdur. Onu maraqlandıran odur ki, rüsum kimə və nəyə görə ödənilməlidir. Sumqayıt bələdiyyəsi isə yığılan rüsumun əmlak vergisi olduğunu deyir. Əlavə edib ki, burada heç bir qanun pozuntusuna yol verilməyib. Qurum 2014-cü ilin iyun ayında Milli Məclisin Vergilər Məcəlləsində etdiyi dəyişikliyi də xatırladıb. Qanuna dəyişiklikləri ötən ilin yanvar ayından qüvvədə olmasına baxmayaraq indiyədək bu verginin hansı səbəbdən yığılmamaması sual altındadır. Mövcud məsələ haqqında aidiyyatı qurumun da münasibətini öyrəndik. Dedilər ki, mövzuya vaxtında ciddi yanaşılmaması belə bir vəziyyətin yaranmasına səbəb olub. O ki, qaldı Mənzil İstismar Sahələrinin vətəndaşlardan yığdığı vəsaitə... Əksər xarici ölkələrin təcrübəsində bələdiyyələr daha geniş funksiya və səlahiyyətlərə sahibdir. Belə ölkələrdə yerli özünüidarəetmə orqanının gəlirlərinin çox hissəsini məhz əmlak vergisi təşkil edir. Araşdırmamızdan belə aydın oldu ki, əhali yaşadıqları mənzilə görə iki quruma vəsait ödəməlidir. Onlardan biri illərdir xidmət pulunun ödənildiyi Mənzil İstismar Sahələri, digəri isə əmlak vergisinin ödənildiyi yerli özünüidarəetmə orqanları, yəni bələdiyyələrdir.

RAMİL ZEYNALLI