Azərbaycanın ən iri sənaye şəhəri sayılan Sumqayıt indi də şadlıq evlərinin bacalarından çıxan tüstüdən boğulur. Burada restoranların sayı o qədərdir ki, artıq şəhərin istənilən yerində tikinti işi aparılanda da sakinlər "yəqin yenə şadlıq evi tikilir” - deyə düşünürlər.
Əslində şəhər sakinlərinin dəfələrlə sonda özünü doğruldan bu ehtimallarını təbii saymaq olar. Çünki Sumqayıtda axır vaxtlar tikilən obyektlərin böyük əksəriyyətini restoranlar təşkil edir. Hazırda şəhərdə təxminən 30-dan çox şadlıq evi var. Təkcə 17-ci mikrorayonda az qala bir-birinə bitişik 9 adda şadlıq sarayı mövcuddur. Bu sarayların çoxu isə yol kənarında və yaşayış binalarının yaxınlığında inşa edilib. İndi həmin binalarda yaşayan sakinlərin vəziyyətini təsəvvür edin. Ətrafa yayılan kabab və ocaq qoxusu, ekologiyaya zərbə vuran zəhərli tüstü... Hər gün axşam saatlarından başlayaraq, sarayların bacalarından çıxan tüstü çoxmərtəbəli binaları ağuşuna alır. Sakinlər belə davam etsə xəstəlik tapacaqlarını deyirlər. Müsahibə vermək istəməsələr də ərazidə fəaliyyət göstərən şadlıq saraylarından bildirdilər ki, bütün ekoloji normativ qaydalara riayət edilir. Buna görə də sakinlərin şikayətinin heç bir əsası yoxdur. "Sağlam mühit və sağlam gələcək” İctimai Birliyinin sədri Vüsal Hətəmov isə fərqli fikirdədir. Onun sözlərinə görə, restoranların bacaları normalara cavab vermir. Bu səbəbdən də atmosferə zərərli tullantılar atılır. Ekspertlər deyir ki, sən demə əslində tüstü çıxan bacanın qülləsi sarayın binasından azı 30 metr yüksəklikdə olmalıdır. Üstəlik tüstü və qoxunun ətrafa yayılmaması üçün xüsusi filtr də quraşdırılmalıdır. Təbii ki, Sumqayıtdakı şadlıq saraylarında normalara cavab verə biləcək belə vəziyyətdən danışmaq mümkün deyil. Bu şəhərdə yağlı və üfunətli tüstünün evlərə daxil olması artıq normadır. Ekologiya və Təbii Sərvətlər Nazirliyindən də bildirirlər ki, Azərbaycanda belə bir standart müəyyənləşdirilməyib. Nazirlik rəsmisi deyir ki, şadlıq evlərindən çıxan tüstünün insan sağlamlığına təsir göstərəcək formatı təyin edilmədiyindən narahatçılıq yalnız iylə bağlı ola bilər. Mətanət Avazovanın sözlərinə görə, onlar Sumqayıt şəhəri üzrə illik qiymətləndirmə aparırlar. 365 gündə yığılan 1200-dən artıq nümunə isə göstərir ki, şəhərdəki ekoloji vəziyyət qənaətbəxşdir. Beləcə sakinlər dediyini dedi. Mütəxəssislər də fikirlərini bölüşdü. İndi restoran sakinləri haqlıdır, yoxsa sakinlər deyə bilmərik. Bildiyimiz odur ki, "xalqımın toy kimi bir adəti var və bu gözəl adətə də hörməti var”...
RAMİL ZEYNALLI
Xəbərdən istifadə edərkən istinad etmək vacibdir.
