Vətən müharibəsində şəhid olan "pələng" ləqəbli şəhid gizir Qəzənfər Mütəllimovun ikinci övladı dünyaya gəlib.
Nişanə adı verilən körpə bu gün Sumqayıtda xəstəxanadan çıxarılıb. Xəstəxanadan atası ilə çıxmaq Nişanəyə nəsib olmasa da o, tək də deyildi. Şəhidimizin döyüş yoldaşları, vətənpərvər insanlarımız, könüllülər bu günündə onun yanında idilər.
Anası Minaxanım Mütəllimova oğlu ilə fəxr etdiyini deyir: "Allahıma şükürlər edirəm ki, Allah mənə elə bir xeyirli övlad verdi. Vətənə, xalqına xeyir verən övladım oldu. Qəzənfər kimi övladım ki, vətən yolunda şəhid oldu. Allahdan arzu edirəm ki, övladları da atalarına layiq, vətəninə, xalqına xeyirli övlad olsun. Allah ömür versin mən də baxım balalarına sevinim inşallah. Allahın köməkliyi ilə”.
Öncə vətən deyirdi Qəzənfər. Vətən yolunda da canını qurban etdi. Övladlarına isə baş ucalığı gətirəcək ad, Şəhid övladı adını miras qoydu:
Şəhid gizirin həyat yoldaşı Zöhrə Mütəllimova isə qızına Nişanə adını niyə qoyduqlarını belə izah edir: "Belə fikirləşirik ki, atasından nişan qaldı, adı Nişanə olsun. Kaş atası da sağ olardı. Mən bilirəm atasının ruhu da bu dəqiqə burdadır, sevinir. Amma kaş cismi də burda olardı. Özü də alardı balasını qucağına”.
Körpə Nişanə doğulduğu klinikadan böyük coşqu ilə yola salındı. Vətənə əmanət olan Nişanə atasını görməsə də onun qəhrəmanlıqlarını eşitdikcə qüvvətli ata əllərini həmişə çiyinlərində hiss edəcək.
Xəbərdən istifadə edərkən istinad etmək vacibdir.
