Bildiyimiz kimi, ölkəmizdə, xüsusən Sumqayıtda nəqliyyat sahəsində bir sıra narahatlıq  və problem mövcuddur. Bunlardan biri də taksi sürücülərinin icazə verilməyən ərazidə taksi fəaliyyəti ilə məşğul olmalarıdır. Daha dəqiq desək, onların dayanma və durma qaydalarının tələbini pozaraq nəzərdə tutulmayan yerlərdə, işıqforların altında və avtobus dayanacaqlarında Bakıya müştəri səsləmələridir. Belə hallar uzun müddətdir ki, əsasən Sumqayıtın mərkəzində - Sülh küçəsininin bir neçə nöqtəsində müşahidə edilir. Xatırlayırsınızsa, bir neçə dəfə 34-cü məhəllədə az qala həyətlərin içindən qanunsuz olaraq sərnişin daşıyan kiçiktutumlu marşrut avtobuslardan yazmışıq. Lakin hələ də onlarla mübarizə üsulları fayda vermir. Şəhər yol polisi və nəqliyyat departamenti əməkdaşları tərəfindən reydləri nəticəsində dərhal həmin sürücülər yoxa çıxırlar, lakin bir müddət sonra yenidən peyda olmağa başlayırlar. Şəhərin əsas giriş küçəsində belə qarışıq nöqtələrdən biri də küçənin Bakı küçəsi ilə kəsişməsində dayanan taksilər və onların böyük səs-küylə müştəri haraylayan sürücüləridir. Taksi dayanacaqları olmadığı halda bu şəxslər qanunsuz taksi fəaliyyəti ilə məşğul olurlar. Bu, azmış kimi düz işıqforun altında və bir neçə metr aralıda avtobus dayanacağında… Bu hal isə küçə kəsişməsi ilə hərəkət edən digər nəqliyyat vasitələrinə mane olmaqla avtonəqliyyat vasitələrinin sıxlığının yaranmasına səbəb olur. Marşrut avtobusları da bəzən dayanacaqda rahat şəkildə sərnişin düşürüb mindirə bilmirlər. Üstəlik, bu taksi sürücüləri ərazidən keçən, yaxınlıqda işləyən sakinləri də tez-tez narahat edir, yerli-yersiz, kimdən gəldi "Bakıya gedib getməmələrini” soruşurlar. Bu da vətəndaşların narazılıq və şikayətinə gətirib çıxarır. Xüsusən bu ərazidə fəaliyyət göstərən  onlarla obyektlərdə çalışan  əməkdaşlar və ziyarətçilər bu haldan gileylənirlər. Taksi sürücülərinin hay-küyündən, hər dəfə edilən sorğu-sualından beziblər.
Sənan Əliyev – Şəhər sakini
-          Mən bu əraziyə yaxın olan maşın təmiri sexində çalışıram. Hər gün eyni mənzərə ilə rastlaşıram. Yoldan keçmək mümkün deyil. Həm maşınları burada saxlayırlar, həm də ki, yeri gəldi-gəlmədi adama suallar verirlər. Ən acınacaqlısı odur ki, bu yolda qəza şəraiti yaradırlar. Bu cür hadisələrin dəfələrlə şahidi olmuşam.
Gülnar Məmmədova – Şəhər sakini
-          Mən tələbəyəm. Hər gün Bakıya gedib gəlirəm. Büdcəmə uyğun olaraq avtovağzaldan avtobusla getməyə üstünlük verirəm. Sözügedən əraziyə çatana qədər bəlkə məndən 10 dəfə Bakıya gedəcəyimi soruşurlar. Üstəlik burada həmin taksi sürücüləri etikadan kənar ifadələr işlədir, bu da mənim haqlı narazılığıma səbəb olur. Xahiş edirəm aidiyyatı orqanlar bununla bağlı ölçü götürsünlər.
Müşfiq Səfərov – Şəhər sakini
-          Şəhərimiz günü-gündən gözəlləşir. Son dövrlərdə həqiqətən də Sumqayıtda abadllıq-quruculuq işləri geniş vüsət alıb. Bu təbii ki, bir şəhər sakinin kimi bməni sevindirir. Amma müəyyən problemlər var ki, gündəlik olaraq insanın əhvalını korlayır. Bunlardan ən başlıcası həmin bu taksi sürücüləridir. Təsəvvür edin ki, bu ərazidə qanunsuz olaraq onlarla taksi dayanır. Və onların da hər birinə məcburuq ki, "Mən Bakıya getmirəm” deyə cavab verək.  Şəhərin əsas mərkəzində belə halların olması utanvericidir.
Məsələ ilə bağlı Sumqayıt şəhər Dövlət Yol Polisinin də mövqeyini öyrəndik. Qurum tərəfindən Xeberle.com-a bu faktla bağlı açıqlamada bildirildi ki, həmin ərazidə baş verən qanunsuzluqlardan xəbərləri var və mütəmadi olaraq reydlər keçirilir. Tərəfimizdən dəfələrlə tədbirlər görülməsinə baxmayaraq problem aradan qalxmayıb. Ona görə də bu yöndə reydləri intensivləşdirəcəyik.
Ümidvarıq ki, şəhər icra hakimiyyəti və digər əlaqədar qurumlar Sumqayıt sakinlərinin haqlı narazılığını nəzərə alaraq, sözügedən ərazidə qanunsuz taksi fəaliyyəti ilə mübarizəni daha da gücləndirəcəklər. Əslində, burda həll olunmaz, qəliz bir şey yoxdur. Həmin taksi sürücüləri "Bakıya səs-küylü sərnişin ovu”nu bir neçə metr arxada Sumqayıt şəhər  Avtovağzalında da davam etdirə bilərlər. Nəticədə həm yol və yol kəsişməsi boşalardı, həm də yaxınlıqda çalışan işçilərin başı dincələrdi.

Xəbərdən istifadə edərkən istinad etmək vacibdir.