Fevralın 23-də Sumqayıt Dövlət Universiteti (SDU) ilə "Azərişıq” ASC-nin Tədris Mərkəzi arasında əməkdaşlıq müqaviləsi imzalanıb.
SDU-dan bildiriblər ki, Tədris Mərkəzinin "Gənclik” korpusunda təşkil olunan imzalanma mərasimində çıxış edən mərkəzin direktoru Vüqar Əliyev təmsil etdiyi qurumda həyata keçirilən yeniliklər barədə məlumat verib. Bildirib ki, mövcud kadr potensialının günün tələblərinə uyğun təkmilləşdirilməsi və yeni gənc kadrların müasir səviyyədə hazırlanması "Azərişıq” ASC Tədris Mərkəzinin başlıca prioritetidir. Bu məqsədlə mərkəzdə kadr hazırlığı keyfiyyətinin yüksəldilməsi üçün müasir dövrün tələblərinə cavab verən, elektroenergetika sahəsində dünyanın ən qabaqcıl texnologiyaları ilə təchiz edilmiş tədris bazası formalaşdırılıb. Eyni zamanda, Tədris Mərkəzi elektroenergetika sahəsi üzrə keyfiyyətli kadr potensialı hazırlanması sahəsində respublikanın digər ali və orta texniki təhsil müəssisələri ilə də əməkdaşlıq edir.
Mərkəzin direktoru, həmçinin qeyd edib ki, respublikanın elektroenergetika ixtisası üzrə kadr hazırlayan ali təhsil müəssisələri – Milli Aviasiya Akademiyası, Azərbaycan Texniki, Azərbaycan Dövlət Neft və Sənaye, Azərbaycan Dövlət Aqrar universitetləri ilə əməkdaşlıq müqavilələri bağlanılıb və müvafiq istiqamətlərdə birgə layihələr həyata keçirilir. Bu təhsil müəssisələrinin tələbələri Tədris Mərkəzinin Bakı və Gəncə şəhərlərində olan korpuslarında, laboratoriya şəraitində dərs keçirlər. "Tədris Mərkəzində tədris prosesi inkişaf etmiş Avropa ölkələrinin qabaqcıl tədris texnologiyası olan dual tədris metodikası üzrə - tədrisin təhsil müəssisəsində istehsalat fəaliyyəti ilə birgə aparılması prinsipinə əsaslanır. Dual sistem üzrə tələbə təhsil müddətinin 70 faizini praktik vərdişlər, 30 faizini isə nəzəri biliklər əsasında keçir. İnanıram ki, bu müqavilə Sumqayıt Dövlət Universitetinin məzunları üçün böyük imkanlar açacaq”, - deyə Vüqar Əliyev vurğulayıb.
Sonra rektor professor Elxan Hüseynov rəhbərlik etdiyi universitetin fəaliyyəti, beynəlxalq əlaqələri barədə danışıb, ali məktəbdə təhsilin inkişafı üçün reallaşdırılan tədbirlərdən, qazanılan uğurlardan söhbət açıb. O, səmərəli əməkdaşlığın genişlənməsindən məmnunluğunu ifadə edərək deyib: "SDU bir çox müəssisələrlə əməkdaşlıq müqaviləsi imzalayıb. Bunun nəticəsi olaraq tələbələrimiz ixtisaslarına uyğun təcrübədə olurlar. Bu da günün tələbinə uyğun olaraq kadr potensialının formalaşmasına təkan verir. Son zamanlar universitetimizin fizika və elektroenergetika fakültəsində müasir avadanlıqlarla təchiz olunmuş yeni laboratoriyalar yaradılıb və tələbələrin istifadəsindədir. İnanıram ki, təməli qoyulan bu əməkdaşlığımız hər iki tərəf üçün əhəmiyyətli olmaqla yanaşı, ölkəmizin kadr potensialının inkişafına böyük töhfələr verəcək”.
Sonra Tədris Mərkəzinin direktor müavini Əvəz Paşayev, SMS Tədris şöbəsinin rəisi Araz Məmmədli, dosentlər Hikmət Əliyev, Qara Həsənov, aparıcı mühəndis Əli Cəlallı mərkəzdə olan müasir cihaz və avadanlıqlarla təchiz olunmuş laboratoriya və sinif otaqları haqqında məlumat veriblər.