Hər bir işin öz sahibi, daha doğrusu peşəkarı var. Ömürləri çalışarkən aldıqları nəfəsə bağlı olanlardan danışacağıq. Söhbət saatsazlardan gedir.
Saatsaz Hacı dayını nəinki bütün ölkə, hətta sərhəddən kənarda da yaxşı tanıyırlar.  Onun tərpənmək mümkün olmayan, balaca, darısqal otaqda işlədiyi isə heç kimin ağlına da gəlmir. Usta gur işıq altında gözündə saatsazlara məxsus gözlük, üzərində işlədiyi saatların içindən zamana yolçuluq edirdi. Prezidentin dostu kimi tanınan qocaman saatsaz 16 yaşından bəri bu sənətlə məşğuldur.
Ustanın şəkil sərgisinə gəlincə, burda kimləri görmək olmazdı ki: Ən gənc müğənnisindən tutmuş siyasətçiyə, vəkilə, dövlət adamına, aktyora, teleaparıcıya kimi hamı saatını Hacı dayıya düzəltdirir. Bu isə onun peşəkarlığından  xəbər verir. Dünyada düzəlməyən saat yoxdur deyir Hacı dayı. Qiymətindən asılı olmayaraq. Hacı dayı deyir ki, saatda nələr etməmişəm. Deyirlər ki, insan gərək işinin peşəkarı olsun. Bəs görəsən Hacı dayı bu barədə nə düşünür?
Bu monoton tik-tak səsləri bizim üçün əhəmiyyətsiz, hətta hardasa yorucu olsa da Hacı ustanın məkanca balaca, mənaca çox geniş olan dünyasının dəyişməz həyat ritmləridir.
Hacı dayı bizə çox şey danışdı. Söhbətcil olduğu qədər zarafatcıldır ustad saatsaz. Danışıq əsnasında əmin olduq ki, vaxtın qiymətini aramızda ondan çox bilən yoxdur.

Xəbərdən istifadə edərkən istinad etmək vacibdir.