Respublikamızda bütün tibb ocaqları ardıcıl olaraq müasir səviyyədə təmir edilir, maddi-texniki bazası ən son texnologiyalara əsaslanan avadanlıqlarla zənginləşdirilir. Sumqayıtda da son bir ildə şəhər 1 nömrəli doğum evi, 1 nömrəli poliklinika, 4 nömrəli uşaq poliklinikası əsaslı təmir olunaraq istifadəyə verilib. Hazırda isə Uşaq Xəstəxanasının infeksion korpusunda tamamlanma işləri aparılır.
Xeberle.com AZƏRTAC-a istinadən xəbər verir ki, martın 16-da Novruz bayramı ərəfəsində şəhərdə daha bir tibb ocağı - şəhər Onkoloji dispanserin binası da əsaslı təmirdən sonra istifadəyə verilib.
Bu münasibətlə keçirilən tədbirdə Sumqayıt Şəhər İcra Hakimiyyətinin başçısı Zakir Fərəcov bildirib ki, ölkəmizdə uğurlu səhiyyə islahatlarının tərkib hissəsi olan yeni xəstəxana və tibb müəssisələrinin inşası Azərbaycan dövlətinin vətəndaşlarımızın sağlamlığına verdiyi önəmin təzahürüdür. Bu istiqamətdə Sumqayıtda da mühüm işlər görülüb.
Qeyd olunub ki, Prezident İlham Əliyevin təşəbbüsü ilə bu sahədə həyata keçirilən tədbirlər Azərbaycanda tibbi xidmətin daha da təkmilləşdirilməsinə geniş imkanlar açır. Ölkəmizdə səhiyyə sisteminin yenidən qurulması, əhalinin sağlamlığının daha yaxşı təşkili, bu sahədə qabaqcıl texnologiyaların tətbiqi və yeni kadr potensialının hazırlanmasını özündə əks etdirən dövlət proqramları tibbi xidmətin səviyyəsini də yüksəldib. Heydər Əliyev Fondunun bu sahədə həyata keçirdiyi tədbirlər isə birbaşa genefondumuzun qorunmasına və mövcud problemlərin köklü həllinə yönəlib.
Sonra dispanserə baxış keçirilib, burada yaradılan şəraitlə tanışlıq olub.
Xəbərdən istifadə edərkən istinad etmək vacibdir.
