Sumqayıtda elə küçələr var ki, ildə bir neçə dəfə asfalt örtüyü təzələnir. Amma təəssüf ki, bu küçələrdə onların adını bildirən lövhələrə rast gəlmək müşkül məsələdir. Elə buna görə də sakinlərin əksəriyyəti yaşadıqları ərazinin hansı küçədə yerləşdiyini bilmirlər. Ən maraqlısı isə budur ki, sumqayıtlıların şəxsiyyət vəsiqələrində belə ünvan hissədə küçə adı qeyd olunmur. Sakinlərin əksəriyyəti küçə və prospektlərin adlarını reklam bukletləri, toy dəvətnamələri və mağazaların ödəniş qəbzlərindən, avtomobillərin naviqasiya sistemindən istifadə etməklə öyrənirlər. Hətta avtomobil qəzası baş verəndə yol polisi əməkdaşlarına hadisənin qeydə alındığı küçəni doğru-dürüst izah edə bilmirlər. Ekspertlər isə mövcud vəziyyəti müxtəlif səbəblərlə əlaqəndirirlər. Onların fikrincə, əsas problem maarifləndirmə işinin lazımi səviyyədə olmamasıdır. Amma tətbiq etmək üçün dünya təcrübəsində kifayət qədər nümunə mövcuddur. Bəs görəsən bu qədər vacib məsələ ilə bağlı aidiyyatı qurumların mövqeyi necədir? Sualımıza cavab olaraq Sumqayıt şəhər İcra Hakimiyyətindən bildirildi ki, bu işə Əmlak Məsələləri üzrə Dövlət Komitəsi nəzarət edir. Qurumun mətbuat katibi Qulu Xəlilov isə nə az, nə çox düz iki həftə bizə gözləməyi tövsiyə etdi. Amma nə fayda. Sonradan zənglərimizə cavab vermədi. Görünür əlaqədar qurumlar küçə və prospekt adlarını göstərən lövhənin olmasını o qədər də vacib saymırlar.