10-15 gün bundan əvvəl Sumqayıtın 4-cü məhəlləsinin 20 -25 ildən bəri asfalt görməyən məhəllədaxili yollarını və ərazilərini asfaltlamağa başladılar. Əlbəttə indi məhəllə nisbətən abıra minib. Qara asfalt yağış yağanda par-par parıldayır. Məhəllə sakinləri də sevinirlər ki, daha atomobilləri  yollarda xarab olmayacaq, uşaqlar məktəbdən palçığın içərisində qayıtmayacaq. Sözün həqiqi mənasında məhəllə adamları səliqə-səhmandan çox sevinirlər. Minnətdarlıq hissləri bitib-tükənməzdir.
Lakin  indi bu asfaltçəkməyin də bir əmması çıxıb. Yağış yağandan sonra, 4-cü məhəllənin 20/15 binası  olan tərəfdəki arakəsmədə yağış suları  yağaraq  gölməçə əmələ gətirib.  Heç məhəlləyə daxil olan ümumi maşin yolunu da sona qədər təmir etməyiblər.  Məhəllənin içərisində isə ağaclar bitən torpaq  hissələri asfaltlayıblar, ona görə də  eyvanların altı yarımçıq qalıb. Çəkilən asfaltı isə necə gəldi, "ala başına-kül başına” edib çəkiblər. Çünki bu asfaltlar çəkilməzdən əvvəl texniki qaydalara riayət olunmalı, asfaltın altına çınqıl döşənməliydi. Asfaltları səkilərdən ayırmaq üçün "bardur” çəkilməliydi. Belə keyfiyyətsiz iş isə dövlət büdcəsinə bir başa ziyan deməkdir. Gördüyünüz gölməçələrə iki dəfə də yağış yağandan sonra,asfalt  yuyulub gedəcək, ən azı bir qış ötəndən sonra, qar da asfaltı yeyəcək. Yenə aşınma yaranacaq. Adətən asfaltı 10-15 illik çəkirlər. Sakinlər hardan bilsinlər ki, gələn il bu asfaltlar sökülüb gedəndən sonra bir də bu yerlərə asfaltçəkənlərin ayağı dəyəcəkmi?

Xəbərdən istifadə edərkən istinad etmək vacibdir.