Ölkəmizdə polis veteranlarının təcrübəsindən, bilik və bacarıqlarından daha geniş və səmərəli istifadə edilir. Onların ictimai təhlükəsizliyin təminində, cinayətlərin profilaktikası və açılmasında, təqsirləndirilən şəxslərin axtarışı tədbirlərinin planlaşdırılmasında, şəxsi heyətin təlim-tərbiyəsində, peşəkarlıqlarının artırılmasında, əhali arasında hüquqi biliklərin təbliğində fəaliyyətləri güclənib.
Xeberle.com-a Daxili İşlər Nazirliyindən verilən məlumatda deyilir ki, Sumqayıt Şəhər Polis İdarəsinin Veteranlar Şurası Polis İdarəsinin şəxsi heyətli ilə sıx təmasda olur, gənc əməkdaşlarla mütəmadi görüşür, onlara öz məsləhətlərini və tövsiyyələrini verirlər. Cari ilin 6 ayı ərzində veteranlar polis və şəhər Təhsil Şöbəsinin əməkdaşları ilə birlikdə şəhərin ümumtəhsil məktəblərində, liseylərdə və kolleclərdə gənclərin vətənpərvər ruhda böyümələri, zərərli vərdişlərə, narkomaniyaya və radikal dini qurumlara qoşulmalarının qarşısının alınması məqsədi ilə şagirdlərlə 43 görüş keçirib və maarifləndirici söhbətlər aparıblar.
Qeyd edək ki, bu ilin birinci yarısında Sumqayıt ŞPİ-nin Veteranlar Şurasının üzvləri 253 cinayətin açılmasında yaxından iştirak ediblər.
Səmərəli fəaliyyətlərinə görə veteranlardan bir neçəsi Sumqayıt şəhər və ŞPİ rəhbərliyi tərəfindən mükafatlandırılıb. 

Xəbərdən istifadə edərkən istinad etmək vacibdir.