"Əsasən yay aylarında tullantılarda qıcqırma gedir. Bu gün qarpızdır, yemişdir, pomidordur, xiyardır, istər-istəməz qalır günün altında, qıcqırır və sonradan pis qoxu əmələ gəlir. Sonra da xırda tüstülənmə olur. Hər gün tullantıların zərərsizləşdirilməsi üçün katlavan qazılır və orada basdırıb üzərini torpaqlayırıq. Yanma getmir tüstülənmə olur. Əraziyə güclü nəzarət var. Orada zibilin yandırılmasından heç bir söhbət gedə bilməz."
Bu sözləri Xeberle.com-a açıqlamasında Sumqayıt şəhər İcra Hakimiyyətinin "Sumqayıt Təmizlik Departamenti” MMC-nin baş mühəndisi Ramil Tağıyev deyib.
R.Tağıyev poliqon ərazisində Sovet dövründən kimyəvi tullantıların da basdırıldığını bildirib. Onun sözlərinə görə, tüstülənmə əsasən bu tullantıların başqa maddlərlə qarışması zaman baş verir. Baş mühəndis poliqon ərazisində tülstülənmə yarandığı təqdirdə lazımi tədbirlər görüldüyünü də qeyd edib.
Xatırladaq ki, indiyədək - son 4 ildə Sumqayıt Təmizlik Departamenti bu məsələlərlə bağlı İnzibati Xətalar Məcəlləsinin 276.1 maddəsinə əsasən inzibati qaydada 27500 manat cərimə olunub.
Qeyd edək ki, Sumqayıtda Məişət Tullantıları Poliqonu 1961-ci ildən fəaliyyət göstərir. Ərazisi 130 hektar olan poliqona gündəlik 1500-1800 kubmtr məişət tullantıları daşınır. Əsasən Sumqayıt şəhəri və tabeliyində olan ərazilərdən eləcə də müqavilə əsasında Abşeron rayonu, Ceyranbatan qəsəbəsindən tullantılar bura gətirilərək zərərsizləşdirilir.
Sumqayıtda da məişət tullantıları emalı zavodunun da tikilməsi nəzərdə tutulur. Artıq bununla bağlı müvafiq təşkilatlar arasında məsləhətləşmələr də aparılır.
Xəbərdən istifadə edərkən istinad etmək vacibdir.
