Sumqayıt şəhərinin müxtəlif məhəllə və mikrorayonlarında yerləşən SSRİ dövründən qalma köhnə istilik qazanxanalarının bərpası, tezliklə mənzillərə istilik verilməsi sakinlərin səbrsizliklə gözlədiyi məsələlərdən biridir. Son günlərdə isə köhnə qazanxanaların ətrafında aparılan abadlıq və söküntü işləri əhalinin razılığı ilə yanaşı, yeni istilik qazanxanaların tikiləcəyi ümidini də oyadıb.

Xeberle.com olaraq məsələ ilə bağlı "Azəristiliktəchizat” ASC-nin "Sumqayıtistiliktəchizatı” İdarəsinin rəisi Avtandil Nuriyevlə əlaqə saxlasaq da, SSRİ dövründən qalma köhnə istilik qazanxanalarının sökülmədiyini, ancaq ətrafında abadlıq işlərinin aparıldığını qeyd etmişdi.

Sakinlər tərəfindən portalımızın elektron ünvanına göndərilən şəkillərdə 13-cü mikrorayonda SSRİ dövründən qalma fəaliyyətsiz qazanxananın söküldüyünün açıq-aşkar göründüyün qeyd etdikdə isə A.Nuriyev kobud şəkildə cavab verib:

"Ay xanım, onları elə özümüz sökürük. Nə lazımdır sökürük, nə lazımdır tikirik. Biz əhalinin dedikləri ilə oturub, duracağıq?! Bizim işlərimiz planlı şəkildə gedir. Hansı ləğv olunsa, hansı sökülməli olsa, sökürük. Gələcəkdə tikinti olanda tikəcəyik. Bu əhalinin işi gücü yoxdur?!"

Lakin əməkdaşımız 13-cü mikrorayondakı qazanxananın yerləşdiyi adıçəkilən əraziyə yaxınlaşdıqda isə, "Sumqayıtistiliktəchizatı” İdarəsinin işi icra edən nümayəndəsi bizə köhnə boruların söküldüyünü və 1-i burda olmaqla, bu mikrorayonun 3 nöqtəsində yeni istilik qazanxanalarının tikilməsinə başlayacaqlarını qeyd etdi.

Maraqlıdır, idarə rəhbəri ayrı söz deyir, onun işçisi başqa söz. Görəsən, hansına inanaq? Köhnə qazanxananın söküldüyünün şahidi olduq, ancaq yenisinin tikiləcəyinə skeptik yanaşırıq.

Ümid edirik ki, bu qazanxananın yeri bəziləri kimi yeni bina tikintisi üçün nəzərdə tutulmayacaq. Hər halda nəinki 13-cü mikrorayonda, Sumqayıtın bütün yaşayış nöqtələrində tezliklə yeni istilik qazanxanalarının tikintisini səbrsizliklə gözləyirik.

Hicranə İsmayılova

Xeberle.com