20 oktyabr 2017-ci il tarixində Fövqəladə Hallar Nazirliyinin Sumqayıt Regional Mərkəzi "GilanTexstil Park” MMC-də "Baş verə biləcək fövqəladə hadisələrə çevik reaksiya verilməsi, xilasetmə işinin təşkili zamanı peşəkarlığın artırılması və nəticələrin aradan qaldırılmasında Nazirliyin yerli qurumları ilə əlaqənin təşkili” mövzusunda tədbir keçirmişdir.
Tədbirdə FHN-in Sumqayıt Regional Mərkəzinin, Sumqayıt Regional Dövlət Yanğın Nəzarəti İdarəsinin, Sumqayıt şəhər Dövlət Yanğından Mühafizə İdarəsinin və "GilanTexstil Park” MMC-nin əməkdaşları iştirak etmişlər.
Tədbir nəzəri və praktik olmaqla iki hissədən ibarət olmuşdur.
Tədbirin nəzəri hissəsində "İstehsalat müəssisələrində baş verə biləcək təbii və texnogen mənşəli fövqəladə hadisələr zamanı düzgün davranış qaydaları”, "İri sənaye müəssisələrində yanğın təhlükəsizliyi qaydaları”, "Zərərçəkmiş insanlara ilkin tibbi yardımın göstərilməsi” mövzularında çıxışlar edilmişdir.
Tədbirin praktik hissəsində şərti olaraq baş vermiş zəlzələ nəticəsində "GilanTexstil Park” MMC-də şərti istehsalat qəzaları və partlayış baş vermiş, partlayış nəticəsində Parkın ərazisində yanğınlar və uçqunlar olmuş, çoxlu sayda insan xəsarət almışdır.
Şərti hadisə barəsində məlumat alan kimi "GilanTexstil Park” MMC mülki müdafiə qüvvələri, Sumqayıt Regional Mərkəzinin Xüsusi xilasetmə hissəsinin xilasediciləri və Sumqayıt şəhər Dövlət Yanğından Mühafizə İdarəsinin 119 nömrəli Yanğından mühafizə bölməsinin qüvvə və vasitələri hadisə yerinə cəlb olunmuşdur. Yaradılmış qərargaha daxil olmuş məlumatlara əsasən dərhal xilasetmə və yanğınsöndürmə əməliyyatlarına başlanılmışdır. Şərti zərərçəkənlərə isə həkim briqadaları tərəfindən ilkin tibbi yardım göstərildikdən sonra onlar xəstəxanaya çatdırılmışdır.

Xəbərdən istifadə edərkən istinad etmək vacibdir.