Sumqayıt şəhər "Sarıqaya" yaşayış massivindəki "Şəfəq" düşərgəsində 1992-ci ildə Laçın rayonundan qaçqın düşən 6 ailəyə ev verilməyib.

Bu ailələr iddia edirlər ki, ev bölgüsü zamanı onlar Masazır qəsəbəsində qaçqınlar üçün inşa olunan binada mənzillə təmin olunmayıblar.

Xeberle.com-a şikayət edən ailələr bildiriblər ki, ailələrin qeydiyyatı üçün "Şəfəq" düşərgəsinə gələn komissiya işini düzgün aparmayıb, qeydiyyat aparılan gün evlərində olmayan insanları qeydə almayıblar.

90 yaşlı Afərim Abdullayeva iddia edir ki, Qaçqınların və Məcburi Köçkünlərin İşləri üzrə Dövlət Komitəsinin nümayəndələri ona "Sən bir neçə aya öləcəksən, sənin nəyinə ev lazımdır?" - deyiblər.

Ailələrin iddialarına görə, onların şikayətlərinə baxılmayıb.

Qeyd edək ki, "Şəfəq" sanatoriyasında məskunlaşan Laçın rayon sakinləri Sənubər Bayramova, Comərd Hüseynov, Ramiz Ağayev, Sevinc Nağıyeva, Səyyar Rüstəmov və Afərim Abdullayevadır.

Komitə rəsmisi: "Qanunsuz yollarla ev almaq istəyənlərə ev verilməyib"

Məsələ ilə bağlı olaraq Qaçqınların və Məcburi Köçkünlərin İşləri üzrə Dövlət Komitəsinin Mətbuat xidmətinin rəhbəri Elçin Qədimovla əlaqə saxladıq. E.Qədimov bildirib ki, köçürmə obyektində yaşayan ailələrin hamısı ev ilə təmin olunub: "Sənubər Bayramovanın Sumqayıtda evi var. Sumqayıtda köçürmə obyektində yaşamır. Comərd Hüseynov də onun kimi. Ramiz Ağayev xaricdə yaşayır, köçürmə obyektində yaşamır. Sevinc Nağıyeva ora təzə gəlib, ona ev düşmür. Səyyah Rüstəmov Sumqayıtda yaşayır, özünün evi var. Afərim Abdullayeva, bu adam orada yaşamır. Həm də o, özünü tək idarə edə bilməz, ev almaq üçün oraya gəlib. Bu adamlar müəyyən yollarla ev almaq, əldə etmək üçün oraya gəliblər. Köçürmə obyektində yaşayan insanların hamısı ev ilə təmin olunub. Ona görə də komissiya bu ailələrin hamısını araşdırıb. Ev ilə təmin olunan insanlar haqq ilə öz evlərini aldılar. Onlar orada yaşasaydılar, ev alardılar."

Məsələ ilə bağlı "Şəfəq" sanatoriyasında yaşadıqlarını iddia edərək, ev ala bilməyən ailələr haqqında ətraflı videomaterialda:

Hicranə İsmayılova

Xeberle.com

P.S Kadrlardan da gördüyünüz kimi binanın ətrafı zibil poliqonunu xatırladır. Sakinlərin bizə dediklərinə  görə hətta gəlişimizlə  bağlı ətrafı təmizləyiblər. Maraqlıdır, təmizlik aparılmasa necə olardı?!