Bu barədə Xeberle.com-a Sumqayıt şəhər 20/21-ci mkr ərazisində ev 777-də məskunlaşan Yadulla Cümşüdov məlumat verib. Y. Cümşüdov bildirib ki, mülk sahibi olan Murad Muradov məhkəmə qətnaməsinə əsasən onları məskunlaşdıqları evdən çıxarır.

Əvvəki yazının linki:http://xeberle.com/cemiyyet/37530-sumqayitda-40-a-yaxin-mecburi-kochkun-meskunlashdigi-evlerden-chixarilir-mehkeme-qerar-verdi-vdeomuracet.html

Barəsində səslənən ittihamlarla bağlı mülk sahibi olan M. Muradov Xeberle.com-a açıqlama verib. O, saytımızın redaksiyasına gələrək tərəflər arasında yaranan münaqişə ilə bağlı bildirib ki, haqqında səsləndirilən ittihamlar əsassız və həqiqətəuyğun deyil.

Mülk sahibi deyib ki, tərəflər arasında yaranan münaqişənin barışıq yolu ilə həll edilməsinə dəfələrlə cəhd etsə də Y. Cümşüdov bundan yayınıb və məsələni daha da arzuolunmaz səviyyəyə çatdırıb.

M. Muradov onu da vurğulayıb ki, sahibi olduğu torpaq sahəsində tikilmiş evlərlə bağlı heç bir iddiası yoxdur və mülkiyyətində olan ərazinin boş torpaq sahəsinin geri qaytarılmasını qarşı tərəfdən istəyir.

M. Muradov  Xeberle.com vasitəsilə  Azərbaycan Respublikasının Prezidenti İlham Əliyevə, I Vitse-prezident Mehriban xanım Əliyevaya və digər qurumlara müraciət də ünvanlayıb.

Müraciəti olduğu kimi diqqətinizə çatdırırıq:

Azərbaycan Respublikasının Prezidenti

cənab İlham Əliyevə

Surəti: Azərbaycan Respublikasının 1-ci vitse Prezidenti

Mehriban xanım Əliyevaya

Surəti: Azərbaycan Respublikasının Ədliyyə naziri

cənab Fikrət Məmmədova

Surəti: Azərbaycan Respublikasının Baş Prokuroru

cənab Zakir Qaralova

Surəti: Azərbaycan Respublikası Ali Məhkəməsinin sədri

cənab Ramiz Rzayevə

Sumqayıt şəhər sakini Muradov Murad Seidqulu oğlu tərəfindən

Ş İ K A Y Ə T

Hörmətli Cənab Prezident!

Hörmətli digər ünvan sahibləri!

"Mən uzun illərdir ki, Sumqayıt şəhərində yaşayıram. Kasıb, fağır bir şəhər sakiniyəm. Başıma gələn qanunsuzluqlar məni şikayət etməyə, Sizlərə üz tutmağa vadar edibdir.

Belə ki, iş adamı Yadulla Cümşüdov və onun qardaşı - Sumqayıt səhiyyə şöbəsinin əməkdaşı Vidadi Cümşüdov bizim ailəyə qarşı etmiş olduqları qanunazidd hərəkətlər barədə dəfələrlə aidiyyəti təşkilatlara şikayətlər etmişəm. Lakin bu şəxslər haqda heç kim qanuni ölçü götürmür.

Bildirirəm ki, Sumqayıt şəhərinin 21-ci mikrorayonunda yerləşən, mənə məxsus daşınmaz əmlakı qanunsuz zəbt etmiş Cümşüdov Yadulla Fətulla oğlu və onun yaxın qohumları Fətullayev Sadıq Yadulla oğlu, Yusifova Şəkər Əyyub qızı, Fətullayev Fətulla Yadulla oğlu, Fətullayev Natiq Yadulla oğlu və Fətullayeva Arzam Sadıq qızı kifayət qədər imkanlı şəxslər olmalarına (torpaq sahələri, evləri, bahalı avtomaşınları, biznes əlaqələri, yaxşı təminatları var) baxmayaraq mənim mülkiyyətimə göz tikiblər. Cümşüdov Yadulla Fətulla oğlu himayədarlarının köməkliyi ilə illərdir mənim əsəblərimlə oynayırlar, Azərbaycan Respublikası qanunlarını ayaq altına ataraq heç bir dövlət qurumunu saymırlar. Hər yerdə məcburi köçkün olmalarını qabardıb heç bir qanunu saymırlar, ölkə başçısının müvafiq sərəncamının olduğunu, "istədiyim yeri zəbt edə bilərəm” kimi məsuliyyətsiz hərəkətlər edirlər. Halbuki vəziyyətdən sui-istifadə etməklə illərdir özlərinə xeyli sayda daşınar və daşınmaz əmlaklar alıblar (sübutlar əlavə olunur).

Məlumat üçün bildiririk ki, şikayətlərimizdə Cümşüdovların Azərbaycan Respublikası Cinayət Məcəlləsinin 188-ci, 134-cü, 320-ci və digər maddələri ilə məsuliyyətə cəlb edilmələrini xahiş edirik.

Məlumat üçün qeyd edirəm ki, qanuni qüvvəyə minmiş məhkəmə qərarları ilə Y.Cümşüdov və onun yaxın qohumlarının mülkiyyətimdə olan əmlakdan çıxarılmaları qət edilmişdir. Qanunlarımıza hörmətsizlik edən Y.Cümşüdov barədə qanuni tədbir görülmür. Y.Cümşüdov və ailə üzvlərinin Sumqayıt şəhərində geniş biznes şəbəkəsi vardır və çox imkanlı şəxslərdirlər (qaçqın statusundan isə sui-istifadə edirlər). Onların pul gücü ilə, həmdə şantaj, hədə-qorxu gəlməklə hərəkət etmələrinə və mülkiyyətimdə olan əmlakımı ələ keçirmələrinə yol verilməməlidir. Çünki, Azərbaycan Respublikası Konstitusiyasının 13-cü maddəsinə əsasən Azərbaycan Respublikasında mülkiyyət toxunulmazdır və dövlət tərəfindən müdafiə olunur.

Bundan başqa qeyd edilməlidir ki, Y.Cümşüdov sap sağlam adam olmasına baxmayaraq əlil kimi özünə pensiya da düzəltdiribdir. Müvafiq komisiya bunu yoxlasa dediklərimin həqiqət olduğu və saxtakarlıq yolu ilə dövlət büdcəsindən oğurluq etdiyi üzə çıxacaqdır.

Məlumat üçün bildirməliyəm ki, cavabdeh Y.Cümşüdov bir ildən artıqdır ki, qanuni qüvvəsini almış məhkəmə aktı qərəzli şəkildə icra etmir, müxtəlif formalı ərizələr verərək məhkəmələrin, hüquqmühafizə orqanlarının fəaliyyətini iflic etməklə məşğuldur.

Yuxarıda qeyd etdiklərim qısa məlumatlarla Y.Cümşüdov haqda az da olsa Sizlərə məlumat verməyə çalışdım. Artıq dərəcədə xahiş edirəm qanunlarımıza sayğısız münasibət bəsləyən şəxslər barədə tədbir görəsiniz.

Hörmətlə: Murad Muradov

04.12.2017-ci il

Tel:0552117222