Bir müddət bundan əvvəl şəhərimizə Bakı-Sumqayıt istiqamətində hərəkət edən yeni tipli avtobuslar gətirilib. Bununla yanaşı, avtovağzaldan kənar hərəkət edən "FORD”ların fəaliyyəti dayandırılmış və digər bütün avtobusların yalnız "Sumqayıt Avtovağzalı”ndan hərəkətinə icazə verilmişdi. Eyni zamanda gətirilən avtobuslarla yanaşı, digər avtobusların da hərəkəti hər iki şəhərin avtovağzalı istiqamətində məhdudlaşdırılmış və beləliklə də onların "20 Yanvar” istiqamətində hərəkətinin qarşısı alınmışdı. Lakin son zamanlar yeni avtobusların və "FORD”ların avtovağzaldan kənar, "20 Yanvar” istiqamətində fəaliyyətinin şahidi oluruq.

Saytımıza şikayət edən şəhər sakini Emin Əliyev deyir ki, günorta saatlarında avtovağzal ərazisindən Bakıya getmək müşkülə çevrilir. Əvəzində isə avtobuslar avtovağzal ərazisindən kənarda işləyir.

Bunun səbəbini öyrənmək üçün Sumqayıt şəhər avtovağzalının müdiri Şamil Abbasov ilə əlaqə saxladıq. Ş.Abbasov sözügedən avtobusların avtovağzaldan kənar fəaliyyətinə icazə verildiyini bildirdi: " Avtovağzalın içərisindən "20 Yanvar” istiqamətində avtobusların hərəkətinə razılıq vermirik. Amma həmin avtobusların avtovağzaldan kənar hərəkətinə icazə verilib”.

Elnarə Salamova

Xeberle.com

Xəbərdən istifadə edərkən istinad etmək vacibdir.