- Sözün açığı, mənim siyasi portretim abstrakt deyil. Mən seçici üçün seçki ərəfəsində əl-ayağa düşən, vədlər verən namizədlərdən deyiləm. Çünki onlar onlayn səsverməni izlədikləri kimi mənim də siyasi fəaliyyətimi izləyir, mətbuatda tez-tez yayımlanan açıqlamalarımı, müsahibələrimi, şərhlərimi və təkliflərimi oxuyur, təşkil etdiyimiz tədbirlərdə iştirak edirlər. Seçicilərim artıq məni tanıyır və səmimiyyətimə inanırlar. Mənim diqqətim və qayğım sadəcə partiya üzvlərimizin üzərində köklənməyib. Bu gün seçici soydaşlarıma vəd etdiyim dəstəyi, mən əslində siyasi fəaliyyətə başladığım ilk gündən göstərirəm.

- Baxın, bu gün ölkə rəhbəri idarəetmə sahəsində böyük islahatlar aparır. Vəzifəsindən sui-istifadə edən, işini düzgün aparmayan məmurlar görəvlərindən uzaqlaşdırılır. Mən əminəm ki, Prezidentin bu kadr islahatları ölkədə müsbət dəyişikliklərə yol açacaq və hesab edirəm ki, Azərbaycan xalqı prezidentin onlardan istədiyi ictimai nəzarəti qanunverici orqan üzərində də həyata keçirə bilər. Onlar Milli Məclisin ağzına su alıb oturan, fəaliyyəti dövründə heç bir təşəbbüskarlıq göstərməyən deputatlardan təmizlənməsinə xidmət edə bilərlər. Bunun üçün seçicinin çox diqqətli olması önəmlidir. Seçici dəyişikliklərin zəruri olmasının fərqində olmasa, ölkənin əsas qanunverici orqanının aqibəti onu maraqlandırmasa, gələcəkdə parlamentin fəaliyyətindən şikayətlənməsi də bir anlam kəsb etməyəcək. Əgər hamımız demokratik ölkənin vətəndaşlarıyıqsa, o zaman məsələyə dar çərçivədən baxa bilmərik. Dövlət bir orqanizmdir və onun yaralı yeri olmamalıdır. Milli Məclis də dövlət orqanizminin ən həssas nöqtələrindən biridir. Odur ki, Milli Məclisdə millətin qaymaqları təmsil olunmalıdır. Əks halda, Milli Məclisin uğursuz tərkibi ölkənin imicini korlaya və dövlətçilik ənənələrimizin inkişafına mane ola bilər. Millətin və dövlətin yeni tipli millət vəkillərinə ehtiyacı var.

- Seçki ərəfəsində hamı sözdə dağları yaracağını vəd edir. Amma Everest səviyyəsində danışıb, məhəllə miqyasında belə iş görmürlər. Yalnız tək-tək insanlar var ki, əməldə də sözlərinə sadiqliyi qoruyurlar. Belə insanları xalq tanıyır, onların dəstəyini hiss edir, seçildiyi bölgə üçün etdiklərini görməzdən gəlmirlər. Mən Qarabağ qazisiyəm və siyasi fəaliyyətim mənim üçün yeni üfüqlər açdıqca, mən də soydaşlarım üçün yeni üfüqlər açmağa, onların sosial durumlarındakı sıxıntıları aradan qaldırmağa, mənim kimi doğma torpaqlarından didərgin düşən insanların burada özlərini qərib hiss etməmələrinə və onlara sadəcə dövlətin deyil, özlərindən birinin - onlar kimi Qarabağ dəhşətlərinin şahidi olmuş birinin diqqət və qayğısını hiss etmələrinə çalışıram. Mənim üçün Qarabağ və qarabağlılarla bağlı hər bir məsələ xüsusi önəm daşıyır : Dilqəm Əsgərov və Şahbaz Quliyev kimi həmvətənlərimizin Ermənistanda hələ də əsirlikdə saxlanmalarından tutmuş beynəlxalq təşkilatların mövcud problemə laqeyd yanaşmalarına kimi. Mənim düşüncəmə görə, yeni nəslə Qarabağı xatırlatmaq yox, onlar üçün Qarabağı geri qaytarmaq lazımdır. Prezident də buna çalışır. Millətin vəkilləri Qarabağ məsələsində prezidentin yanında olmalıdır.

- Hesab edirəm ki, bu seçkilərdə bütün rəqiblər gənclərdən ibarət olsaydı, rəqabət daha zövqlü və sağlam olardı. Çünki Milli Məclis sadəcə 125 nəfərin oturub şəxsi məsələlərini həll edəcəyi məkan deyil. Orada millətin vəkilləri oturur və milli maraqlara xidmət edirlər. Və bu deputatların gənc olması, yüksək intellekti, entuziazmı daha çox yenilikçi mühit və Azərbaycan əhalisinin yaxın gələcəkdə inkişaf etmiş ölkələrin əhalisiylə eyni dərəcədə imkanlara sahib olmasına real şərait yaradır. Mənim komandamın da tərkib hissəsini gənclər təşkil edir.