Sumqayıtdan Bakı istiqamətinə qanunsuz sərnişin daşıyan "Ford" lara qarşı keçirilən reyd zamanı rayonlara doğru hərəkət edən nəqliyyat vasitələri də inzibati məsuliyyətə cəlb olunublar və avtomobillər cərimə meydançasına aparılıb.
Bu isə Sumqayıtdan ölkənin müxtəlif rayonlarına sərnişindaşıma ilə məşğul olan sürücülərin narazılığı ilə qarşılanıb.
Xeberle.com xəbər verir ki, belə sürücülərdən biri birlik.az saytına bildirib ki, qanuni olaraq fəaliyyət göstərmələrinə baxmayaraq şəxsi mülkiyyətləri olan avtomobilləri əllərindən alınaraq cərimə meydançasına yerləşdirilib: "Biz qanuni olaraq fəaliyyət göstərsək də, şəxsi mülkümüz olan avtomobilərimiz əllərimizdən alınıb. Hansı orqana gediriksə, bizə deyirlər ki, gedin Sumqayıt İcra hakimiyyəti başçısının müavini Sahib Quliyevdən icazə alın.”
Sumqayıt-Lənkəran marşrut xətti üzrə hərəkət edən 50 BC 326 dövlət nömrə nişanlı "Ford" markalı mikroavtobusunu sürücüsü Marif Səlimov deyir ki, Sumqayıt -Bakı xətti üzrə qanunsuz işləyən nəqliyyat vasitələrinin güdazına onlar da gedib: "Aidiyyatı qurumlar onlara qarşı reyd apararkən məni də onların gözünə qatdı. Halbuki mənim həm Sumqayıt avtovağzalı ilə rəsmi müqaviləm var, həm də ki müvafiq qurumdan işləmək üçün "Fərqlənmə nişanı” almışam. Fevralın 8-ə kimi fərqlənmə nişanımın vaxtı var. Bunun üçün pul ödəmişəm. Bütün ödənişləri, o cümlədən vergi və Dövlət Sosial Müdafiə Fonduna olan ödənişləri edən və qanunlara riayət edən sürücüyəm. İcra məmurlarından şəxsi mülkümü geri istəsəm də, deyirlər ki, hələlik gözlə. Əgər bizim işimiz qeyri-qanunidirsə, onda bizə işləmək üçün "Fərqlənmə nişanı”nı niyə verirlər?! Niyə bizi vergi orqanında və DSMF-də sənədləşdirirlər?! Onu da deyim ki, idarə etdiyim avtomobildə sərnişin üçün nəzərdə tutulan oturacaqlar icazəyə uyğundur: 16+1”
M. Səlimovla yanaşı, 10 MŞ 318 dövlət nömrə nişanlı nəqliyyat vasitəsinin sürücüsü Malik Ağayev, 90 DE 136 dövlət nömrə nişanlı mikroavtobusun sürücüsü İmamverdi Rəcəbov və 50 CK 264 dövlət nömrə nişanlı nəqliyyat vasitəsinin sürücüsü İlyas Rəcəbov da analoji halla qarşılaşıblar. Onlar hesab edir ki, sahibi olduları avtomobillərin saxlanması qanunauyğun deyil.
Məsələ ilə bağlı Sumqayıt Şəhər İcra Hakimiyyətinin Mətbuat xidmətindən bildirdilər ki, hazırda aidiyyatı məsəsləylə bağlı komissiya işləyir: "Nəticə ilə bağlı ictimaiyyətə məlumat veriləcək."
Xatırladaq ki, ötən ilin mart ayında Abşeron rayonu ərazisində Sumqayıt şəhər sakini Namiq Hüseynovun idarə etdiyi "Ford” markalı mikroavtobusun qəza törətməsi nəticəsində 6 tələbə həyatını itirmişdi.
Araşdırmalar göstərir ki, ağır qəzaların baş vermə səbəbi onların "Ford” olması ilə bağlı deyil, sürücülərin qeyri-qanuni fəaliyyəti, avtomobillərin texniki standartlara cavab verməməsi və nəzərdə tutulan həddən artıq sərnişin götürmələridir.
Xəbərdən istifadə edərkən istinad etmək vacibdir.
