1 iyun Uşaqların Beynəlxalq Müdafiəsi Günüdür. Dünyanın bir çox ölkəsində olduğu kimi, Azərbaycanda da bu gün xüsusi olaraq qeyd olunur və əksər valideynlər həmin gün uşaqlarına həmişəkindən daha çox vaxt ayıraraq onları əyləndirməyə səy göstərirlər. Bəs Sumqayıtın tanınmış şəxsləri, ziyalıları öz övladları və ya nəvələri ilə bu günü necə qeyd edəcəklər? Onlar uşaqlara nə arzulayırlar?Xeberle.com olaraq apardığımız kiçik sorğunu sizə təqdim edirik.

 

Sumqayıt Regional Mədəniyyət İdarəsinin rəisi Mehman Şükürov: "Nəvəm balacadır, 1 yaşı var. Adı Onurdur. Düzdür o hələ anlamır ki, bayram, hədiyyə nədir. Amma buna baxmayaraq bu gün onunla bulvarda bir axşam gəzintisi etməyi planlaşdırıram. Uşaqlara xoşbəxtlik arzulayıram. Daim üzləri gülsün və sağlam olsunlar. Onlardan yoxdur da... İstər övlad olsun, istərsə də nəvə. Onları sevmək, əzizləmək, qayğılarına qalmaq, ünsiyyət yaratmağa çalışmaq, sevmək lazımdır”.

 

Azərbaycanın Əməkdar İdman Ustası, ikiqat dünya, Paralimpiya Oyunları və yeddiqat Avropa çempionu İlham Zəkiyev: " Üç övladım var. Böyük oğlumun 12 (İlkin), qızımın 10 (Aynur) və son beşiyim olan oğlum Həmzənin 5 yaşı var. Biz yalnız bir günü deyil, hər günümüzü uşaqlarımıza həsr etməyə, onları sevindirməyə çalışırıq. Uşaqlara dərslərində müvəffəqiyyətlər arzu edirəm. Onlar bizim gələcəyimizdir. Savadlı uşaqlar isə yaxşı gələcək deməkdir. Arzu edirəm ki, daim idmanla məşğul olaraq sağlam böyüsünlər. Allah bütün övladları saxlasın”.   

 

Şair, tənqidçi,uşaq yazarı Rafiq Yusifoğlu: "Dörd nəvəm var. Onların 14 (Aslan),12 (Sara), 11 (Fateh) və 8 (Fatimə) yaşları var.  İki nəvəm (Fateh və Fatimə) Amerikada, ikisi isə (Sara və Aslan) Bakıda qalır. Hazırda onlarla görüşmək imkanım yoxdur. Buna baxmayaraq mən bütün azərbaycanlı uşaqları öz nəvələrim hesab edirəm. Çünki Azərbaycanda elə uşaq yoxdur ki, mənim şeirlərimi əzbər bilməsin. Böyük türk şairi Nazim Hikmətin sözü yadıma düşür: "  Dünyanı heç olmazsa bir günlüyə uşaqlara verək, allı-güllü balon kimi oynatsınlar onu”. Mən düşünürəm ki, dünyanı bir günlüyə deyil, həmişəlik uşaqlara vermək lazımdır. Uşaqlar saf, təmiz və ədalətlidirlər. Onlar bizim gələcəyimizdir. Nəvələrim də daxil olmaqla, bütün uşaqları təbrik edirəm. Allah onların canını sağ eləsin”.

 

Mia.az saytının redaktoru Zaur Əhməd: " 2 övladım var, bir qız (Duyğu) və bir oğlan (Ərhun). Adətən bu gün uşaqları gəzinitiyə, parka aparırıq. Yəni uşaqlar nə istəyir, onları etməyə çalışırıq. Arzu edirəm ki, dünyada məhz uşaqların üzü gülsün. Çünki dünyada ən gözəl səs uşaq gülüşü səsidir və bu da yalnız firavan, azad, xoşbəxt ölkədə mümkündür. Ona görə də arzu edək ki, ölkəmiz daha da gözəlləşsin, inkişaf etsin və uşaqlarımızın üzü daim gülsün”.

 

Xeberle.com saytının həmtəsisçisi və redaktoru Ramil Zeynallı: " 1 oğlum var, adı Yaqubdur. Onun 4 yaşı var. Sözün düzü iş rejimim yoğun olduğu üçün ona çox diqqət ayıra bilmirəm. Amma bu gün çalışacam ki, ona kifayət qədər vaxt ayırım. Ümumiyyətlə düşünürəm ki, hər hansı bir hadisə üçün xüsusi gün olmamalıdır. Uşaqların doğması, yadı yoxdur. Tanımadığın bir uşağı da öz övladın, körpən kimi sevib-əzizləyə bilərsən. Səbəbi də məlumdur. Onlar məsum, müqəddəs, pak və təmiz varlıqlardırlar. Uşaq sevinc, xoşbəxtlikdir. Onlara hər zaman diqqət ayrılmalıdır. Yaşadığımız dünyada hər il milyonlarla uşaq aclıq, xəstəlik və digər səbəblərdən həyatını dəyişir.  Uşaqlara daim valideyn qayğısı, diqqəti ilə əhatə olunmağı arzu edirəm. Heç bir uşaq atasız, anasız böyüməsin. Yəni ana qayğısını, nəvazişini, ata diqqətini görsün. Onlara günəşli sabah, sülh arzulayıram. Bundan gözəl həyatda nə ola bilər ki?!”