Avtobus
istehsalı ilə məşğul olan şirəkətlərin demək olar ki, hamısı fövqəladə halları
nəzərə alır. Bu məqsədlə nəqliyyat vasitələrinin konstruksiyasına xüsusi vasitələr
əlavə olunur. Təbii ki, bütün bunlar hər hansı fövqəladə vəziyyət yarandığı
vaxt sərnişinlərin təhlükəsizliyini təmin etmək üçün nəzərdə tutulub.
Bəzən Sumqayıtda ictimai nəqliyyatda yalnız çəkic
üçün qoyulan yerə rast gəlirsən. Ya sərnişinlər, ya da sürücülər tərəfindən çəkiclər
qoyulduğu yerdən götürülür.
Sumqayıt
Avtomobil Nəqliyyatı ilə Sərnişindaşıma İdarəsinin rəisi Tofiq Saydumovla əlaqə saxladıq. İdarə rəisi Xeberle.com-a bildirdi ki, rəhbərlik etdiyi qurum ictimai nəqliyyatda təhlükəsizlik
məsələsinə cavabdeh deyil.
Ekspertlər
isə deyirlər ki, avtobuslarda texniki təhlükəsizlik qaydaları nəinki sürücülərin,
eyni zamanda sərnişinlərin də diqqətinə davamlı olaraq çatdırılmalıdır. Təhlükəsizlik
çəkiclərinin olmaması isə ağır faciələrə gətirib çıxara bilər. Bu kimi məsələlərə
ciddi nəzarət edilməlidir ki, hadisə baş verən zaman xəsarət alanların sayı
minimum olsun. Sürücülərin günahı sübuta yetirilərsə, inzibati qaydada tənbeh
edilə və cəzalandırıla bilər. Digər tərəfdən sərnişinlər də ictimai nəqliyyatdan
istifadə edərkən təkcə oturub getmək barədə düşünməməlidirlər. Mənzil başına
sağ-salamat çatmaq üçün avtobuslarda hər kəsin təhlükəsizlik barədə düşünməsi
vacib şərtdir.
Qeyd edək
ki, avtobus qəzaya uğrayarkən pəncərəni sındırmaq üçün nəzərdə tutulan təhlükəsizlik
çəkicləri bir qayda olaraq avtobuslarda olmalıdır. Çünki heç kəs qəzadan sığortalanmayıb.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
