"Çətinliklə də olsa Sumqayıtın "Yaşıldərə” yaşayış massivində ev inşa etmişik. Tikilinin bütün sənədlərinin
qaydasında olmasına baxmayaraq əraziyə elektrik
xətləri çəkilmir. Dəfələrlə Sumqayıt
Elektrik Şəbəkəsinə müraciət etsək də şikayətimizə məhəl qoyan olmayıb.”
Bu
sözləri Xeberle.com-a Sumqayıtın "Yaşıldərə”
yaşayış massivinin 6-cı yeni yaşayış massivi 49-cu məhəllədə ev sahibi olan Pərvanə
Əmir İbrahimi deyib.
P. İbrahimi
bildirib ki, həyat yoldaşı I qrup Qarabağ əlili olub və 9 il bundan qabaq dünyasını dəyişib: "Həyat yoldaşımın ölümündən sonra
bizə burada pay torpaq verilib. Çox çətinliklə də olsa ev tikmişik. Amma ərazidə kommunikasiya xətləri, o cümlədən işıq, qaz və su xətləri olmadığından bu evdə yaşaya bilmirik. Məcbur olub kirayə ev
tutub qalırıq”.
P.
İbrahimi deyir ki, aidiyyatı qurumlara dəfələrlə
müraciət etməsinə baxmayaraq, dərdinə əlac olan tapılmayıb. Qurumlar ərazidə
kommunikasiya xətlərinin uzaq məsafədə yerləşdiyini əsas gətirərək tələbimizi
yerinə yetirməyiblər: "Maraqlısı odur ki, bizim evin çıxarışı (kupça) olmasına
baxmayaraq kommunikasiya xətləri çəkilmir.
Amma sənədsiz evlər isə bütün kommunikasiya xətləri ilə təchiz edilib. Lazım olan dövlət
rüsumunu ödəməyə də hazıram. Təki işığım, suyum verilsin, artıq kirayə pulunu
ödəməyə maddi imkanım çatmır. Uşaqlar böyüdükcə xərclərim də artır. Kirayə
pulunu ödəmək ailə başçısı olmayan qadın üçün çətinliklər yaradır”.
Məsələ ilə
bağlı aidiyyatı qurumlarla əlaqə saxladıq. Sumqayıt Elektrik Şəbəkəsinin baş mühəndisi
Arzuman İsmayılov Xeberle.com-a bildirib ki, mövcud problemdən xəbərdardırlar:
"Belə müraciətlər yüzlərlədir. Daxil olan
ərizələr əsasında nümayəndələr yerində baxış keçirir. Lakin ərazinin uzaqlığı və
ora yaxın şəbəkənin olmaması əlavə
problemlər yaradır. Məhz bu məsələ Sumqayıt Elektrik Şəbəkəsinin səlahiyyətlərində
olmadığı üçün vətəndaşa kömək edə
bilmirik. Vətəndaş birbaşa "Azərişıq”" ASC-yə müraciət etməlidir, çünki ərazidə yeni şəbəkənin
quraşdırılması işi birbaşa mərkəzə məxsusdur”.
Sumqayıt
Sukanal İdarəsinin rəis müavini Qurban Mikayılov isə əlaqə yaratmaq cəhdlərimiz
boşa çıxdı.
Ümidvarıq
ki, vətəndaşın problemi tezliklə öz həllini
tapmış olacaq.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
