Sumqayıt sakini redaksiyamıza şəhərin işi “xod” gedən mağazalarından (avropalaşmış dilimizdə - “market”lərdən) birində satıcı xanımın “balıq dələduzluğu” etməsindən şikayət edib. Belə ki, orta yaşlı satıcı qadın dekabrın 23-də axşam saatlarında işdən qayıdan camaatın mağazaya gur gəlişındən, növbədə yaranmış sıxlıqdan öz xeyrinə məharətlə istifadə edib. Tamamilə qalın buz içərisində olan, kiloqramı 2 manat 80 qəpiklik balıqdan çəkilməsini xahiş edən alıcıdan satıcı xanım 6 manat 30 qəpik almışdır. Alıcı soruşduqda ki, “2 kq-dan artıq oldu ki?” sualına satıcı “2,2 kiloqram” cavabını verib (satıcı tərəzinin qarşısını soyuducunun üzərinə yığdığı qatıq, dovga, mayonez və s. bankalarla tutduğundan - əlbəttə ki məqsədli şəkildə - alıcı nəinki çəkinin və aldığı malın qiymətini, heç tərəzini də görə bilməyib). Alıcıda müəyyən şübhə yaransa da, növbədə adamların çox olduğunu nəzərə almış və münaqişə yaratmaq istəməyərək, deyilən məbləği ödəyib və evə tələsib. Yalnız avtobusda hesablayarkən məlum olub ki, lap elə “2,2 kiloqram” çəki hesabı ilə satıcı onu 14 qəpik aldadıb. Alıcı onu da etiraf edir ki, həmin mağazanın digər şöbələrində satıcıların hamısı bütün ərzaqları “qramına qram” çəkir, qalıq pulları hətta qəpiyinə qədər geri qaytarırlar, (buna görə də Sumqayıt sakinləri arasında populyarlıq qazanmış həmin mağazanı “antireklam” etmək istəmirik – red.) tək o balıq satıcısından başqa. Redaksiyamıza müraciət edən alıcı evə gəldikdən sonra 14 qəpik yox, düz 2 manata qədər aldadıldığını başa düşüb. Belə ki, buzunun əriməsi üçün iri bir qaba qoyulmuş balıq tikələrinin ümumi çəkisi onda şübhə doğurub. Aldıqlarını ərimiş suyu ilə birlikdə çəkdikdə gözlərinə inanmayıb. Tərəzi su ilə birlikdə 1,8 kq-ı göstərirdi. Suyu boşaltdıqdan sonra isə xalis çəki 1,5 kq-dan da az olub. Deməlı, alıcı çəkidə 700 qram aldadılıb. Dünən səhər o, həmin mağazaya gedərək, “market”in müdiri ilə ğörüşmək istəyib, lakin onun əvəzinə özünü müdir kimi təqdim edən başqa birisi irəlı duraraq, alınmış malı çəkdirib, onun 1,48 kq olduğunu gördükdə çatişmayan çəkinin buzun əriməsi və “buxarlanması” ilə izah etməyə çalışıb. Soruşanda ki, 2,2 kq çəkidə olan balığın buz qatı 700 qram ola bilərmi və niyə də olmalıdır, bildirib ki, bizə balığı belə verirlər. Alıcı onu nə qədər inandırmağa çalışsa da ki, buzun suyunun çəkisi cəmi 300 qram olub və hətta o (alıcı) bununla razılaşsa belə, yenə də satıcı bilərəkdən onu qiymətdə 400 qram aldadıb. “Müdir əvəzi” artıq alınmış pulu ödətdirərək, satıcının cəzalandırılacağını desə də, buna inanmaq çətindir. Çünki alıcıları tərəzi ovsununa salaraq, onların hər birini qiymətdə kifayət qədər aldatmağı bacaran “məharətli” alıcını kim əldən buraxar ki? Odur ki, hörmətli oxucular-alıcılar, çalışın ki, aldığınız malın tərəzidə sizin görə biləcəyiniz tərzdə çəkilməsinə nail olasanız. Yoxsa, həm “artıq pulunuz” kimlərinsə cibinə gedəcək, həm də əsəbləriniz korlanacaq... Xeberle.com