“Sumqayıt şəhərində 2012-ci illə müqayisədə, 2013-cü ildə Vərəm xəsətələrinin sayı 10 faiz azalıb”. Bunu SİA-ya Sumqayıt şəhər Vərəm Əleyhinə Dispanserin baş həkimi Asif Quliyev deyib.

Onun sözlərinə görə, Sumqayıt şəhərində bu xəstəliyin ağır fəsadlarına hələ ki, rast gəlinməyib: “Çünki xəstəxanamız bütün dərman preparatları ilə tam təmin olunub. Əvvəlki illərə nisbətən xəstəxana dərman preparatlarından heç bir korluq çəkmir. Ümumiyyətlə, vərəm xəstələlərinə ən çox 15- 50 yaş arasında olan insanlarda rast gəlinir. Bu xəstəliyə yoluxan kişilərin sayı qadınlardan üç dəfə artıqdır. Hazırda Ümumdünya Səhiyyə Təşkilatı (ÜST) bu xəstəliyin qarşısının alınması istiqamətində ən çox ambulator müalicəyə üstünlük verir. Təbii ki, bunun üçün də xüsusi proqram mövcuddur. İnsanlar sözügedən xəstəliyə yoluxmamaq üçün ilk növbədə, sanitar-gigiyenik qaydalara əməl etməlidir. Eləcə də onların yatdıqları otağın havası tez-tez dəyişməli və təmiz olmalıdır. Bir sözlə, nəm, rütubətli yerlərdən, eləcə də alkoqalizmdən, narkomaniyadan uzaq olmaq lazımdır”.